اسلام آباد ۔ 24 ستمبر (اے پی پی)یورو ایشیئن کانفرنس میں بھارت کی روڑے اٹکانے کی کوشش ناکام ہو گئی۔ ڈپٹی چیئرمین سینیٹ سلیم مانڈوی والا کی تقریر کے دوران بھارتی وفد ہلڑ بازی کرتا رہا، مسئلہ کشمیر پر قرارداد پیش کرنے پر بھارتی وفد سیخ پا ہوگیا۔ مقبوضہ کشمیر میں بھارتی مظالم اجاگر کرنے پر بھارتی وفد نے سلیم مانڈوی والا کی تقریر روکنے کی کوشش کی۔ سینیٹر سلیم مانڈوی والا نے کشمیر میں بھارتی مظالم کے خلاف قرارداد پیش کر دی۔ سلیم مانڈوی والا نے قرارداد پیش کرتے ہوئے کہا کہ یورو ایشیئن کانفرنس کے شرکاءبھارتی مظالم کی بھرپور مذمت کرتے ہیں، کشمیر سمیت دیگر ممالک میں انسانی حقوق کی خلاف ورزیاں قابل مذمت ہیں، ظلم اور جبر کے ذریعے انسانوں کی مرضی کو دبایا نہیں جا سکتا۔ سلیم مانڈوی والا نے کہا کہ انسانی حقوق کی خلاف ورزیاں اقوام متحدہ کے منشور کے خلاف ہیں۔ یورو ایشیئن کانفرنس کے شرکاء کشمیر، فلسطین اور میانمار میں مظالم کا نوٹس لیں۔ سلیم مانڈوی والا نے کہا کہ کشمیر سمیت ہر جگہ طاقت کے استعمال کو مسترد کرتے ہیں، خود مختاری کشمیری عوام کا جمہوری حق ہے جس کی حمایت کرتے ہیں۔ سلیم مانڈوی والا نے کہا کہ دنیا بھر میں غیر جمہوری قوتیں عوام کو ڈرا دھمکا کر مذاکرات کے راستے بند کر رہی ہیں، کشمیر اقوام متحدہ کا نامکمل ایجنڈا ہے، مسئلہ کشمیر بین الاقوامی برادری کےلئے ٹیسٹ کیس ہے۔ سلیم مانڈوی والا نے کہا کہ کشمیر میں انسانی حقوق کی خلاف ورزیوں پر آواز اٹھانے والے ممالک کے شکر گزار ہیں، ترکی، ایران، یو اے ای اور دیگر ممالک نے کشمیر میں مظالم کی مذمت کی ہے۔ بین الاقوامی تنظیموں نے بھی مقبوضہ کشمیر میں بھارتی مظالم کے خلاف آواز بلند کی ہے۔
