اسلام آباد۔3اکتوبر (اے پی پی):بینظیر انکم سپورٹ پروگرام (بی آئی ایس پی) اور اقوام متحدہ کے ورلڈ فوڈ پروگرام (ڈبلیو ایف پی) نے بینظیر نشوونما پروگرام کی توسیع کیلئے اپنی شراکت داری میں مزید دو سال کا اضافہ کیا ہے۔ اس حوالے سے جمعرات کو بی آئی ایس پی ہیڈ کوارٹر میں تقریب منعقد ہوئی جس میں چیئرپرسن بی آئی ایس پی سینیٹر روبینہ خالد کی موجودگی میں سیکرٹری بی آئی ایس پی عامر علی احمد اور ڈبلیو ایف پی کی کنٹری ڈائریکٹر اور نمائندہ کوکو اوشیاما نے معاہدے کی دستاویزات کا تبادلہ کیا ۔ یہ تعاون پاکستان میں غذائی قلت سے نمٹنے کی اہم ضرورت کو اجاگر کرتا ہے، جہاں پانچ سال سے کم عمر کے تقریباً 40 فیصد بچے ناقص غذائیت کی وجہ سے غذائی کمی کا شکار ہیں۔
بینظیر نشوونما پروگرام کا مقصد مستحق گھرانوں سے تعلق رکھنے والی حاملہ اور دودھ پلانے والی خواتین (پی ایل ڈبلیو) اور ان کے دو سال سے کم عمر کے بچوں کو اضافی نقد امداد فراہم کرکے غذائی کمی کے مسئلے پر قابو پانا ہے۔ خواتین اور بچوں میں 2,500 روپے میں فی سہ ماہی جبکہ بچیوں میں 3،000 روپے فی سہ ماہی تقسیم کئے جاتے ہیں۔ اس موقع پر سینیٹر روبینہ خالد نے اس نئے معاہدے کی اہمیت پر زور دیتے ہوئے اسے ملک میں غذائی قلت کے خلاف جنگ میں ایک اہم قدم قرار دیا۔ انہوں نے کہا کہ حکومت پاکستان کو اقوام متحدہ ڈبلیو ایف پی کے ساتھ اس اہم شراکت داری کو مزید مستحکم کرنے پر فخر ہے۔
بینظیر نشوونما پروگرام کے ساتھ ہماری وابستگی غیر متزلزل ہے اور ہم اس کی رسائی اور تاثیر کو بڑھانے کے لیے کوشاں ہیں تاکہ اس بات کو یقینی بنایا جا سکے کہ پاکستان میں ہر بچے کو زندگی میں ایک صحت مند آغاز کا موقع ملے جو کہ روشن اور زیادہ خوشحال مستقبل کی بنیاد رکھتا ہے۔ معاہدے کا پہلا مرحلہ جون 2024 میں ختم ہوا اور دوسرے مرحلے کے تحت یہ پروگرام 562 سہولت مراکز کے ساتھ 157 اضلاع کا احاطہ کرے گا۔ ڈبلیو ایف پی منظور شدہ ڈیزائن اور پروٹوکول کے بعد معیار پر زیادہ توجہ کے ساتھ پروگرام کے نفاذ کو جاری رکھے گا۔ دوسرا مرحلہ دو سال تک چلے گا جو جون 2026 میں اختتام پذیر ہو گا۔
دستخط کی تقریب کے اہم شرکاء میں ڈپٹی کنٹری ڈائریکٹر راتھی پال کرشنن، پروگرام کے سربراہ ایرک کینیفک، سپلائی چین کی سربراہ ری ایشی، پروگرام پالیسی آفیسر میمونہ غفار، ہیڈ آف نیوٹریشن ڈاکٹر یاسر احتشام، پروگرام پالیسی آفیسر نیوٹریشن ڈاکٹر عاصمہ بدر، نیوٹریشنسٹ ڈبلیو ایف پی کے پی آفس ڈاکٹر اعجاز حبیب اور پروکیورمنٹ آفیسر احمد حسن بھی موجود تھے۔ نئے دو سالہ معاہدے پر باضابطہ دستخط 28 اگست 2024 کو روم میں ڈبلیو ایف پی کی اسسٹنٹ ایگزیکٹو ڈائریکٹر برائے پارٹنرشپ اینڈ انوویشن رانیا دگاش کمارا اور سیکرٹری بی آئی ایس پی عامر علی احمد کے درمیان ہوئے تھے۔
Short Link: https://urdu.app.com.pk/urdu/?p=508125
