آئی جی اسلام آباد سید علی ناصر رضوی کا شہرمیں امن و امان کا جائزہ ، موثر پولیسنگ اور جرائم پر قابو پانے کی ہدایت

اسلام آباد۔4اپریل (اے پی پی):انسپکٹر جنرل پولیس (آئی جی پی) اسلام آباد سید علی ناصر رضوی کی سربراہی میں وفاقی دارالحکومت میں امن و امان کی مجموعی صورتحال کا جائزہ اجلاس منعقد ہوا۔ اجلاس میں ایس ایس پی انویسٹی گیشن اسلام آباد محمد عثمان طارق بٹ اور ڈی ایس پی سی آئی اے نے شرکت کی۔ پولیس حکام نے ہفتہ کو اے پی پی کو بتایا کہ اجلاس میں جرائم کی روک تھام، موثر پولیسنگ، گشت کے نظام، فوری ردعمل اور عوامی تحفظ سے متعلق اقدامات پر تفصیلی تبادلہ خیال کیا گیا۔

آئی جی سید علی ناصر رضوی نے شہر میں سکیورٹی کو بہتر بنانے اور پولیسنگ کے طریقہ کار کو مضبوط بنانے کے لیے جاری اقدامات کا ایک جامع جائزہ لیا۔ انہوں نے آپریشنل کارکردگی کو بڑھانے، واقعات پر بروقت ردعمل کو یقینی بنانے اور جرائم پر قابو پانے کے لیے فعال حکمت عملی اپنانے کی ضرورت پر زور دیا۔

انہوں نے افسران کو ہدایت کی کہ گشت کے نظام کو مزید بہتر بنائیں اور قانون کے بہتر نفاذ کے لیے مختلف یونٹس کے درمیان موثر رابطہ کاری کو یقینی بنائیں۔آئی جی اسلام آباد نے اس عزم کا اعادہ کیا کہ شہریوں کے تحفظ کو یقینی بنانا اور امن و امان برقرار رکھنا اسلام آباد کیپٹل ٹیریٹری (آئی سی ٹی) پولیس کی اولین ترجیح ہے۔