ابوظہبی گرینڈ سلم جوڈو ٹورنامنٹ جمعہ سے شروع ہوگا،14 بین الاقوامی مقابلوں ہوں گے

ابوظہبی۔27نومبر (اے پی پی):ابوظہبی گرینڈ سلم جوڈو ٹورنامنٹ کل(جمعہ سے )30 نومبر تک مباردہ ایرینا، ابوظہبی میں شروع ہوگا۔ابوظہبی گرینڈ سلم جوڈو ٹورنامنٹ کی انتظامی کمیٹی نے مردوں اور خواتین کے لیے 14 بین الاقوامی مقابلوں کی منظوری دی ہے۔ اماراتی نیوز ایجنسی وام کے مطابق یہ ٹورنامنٹ متحدہ عرب امارات جوڈو فیڈریشن کی جانب سے وزارتِ کھیل، نیشنل اولمپک کمیٹی کی نگرانی اور ابو ظہبی سپورٹس کونسل کے تعاون سے منعقد کیا جا رہا ہے جبکہ عالمی سطح پر انٹرنیشنل جوڈو فیڈریشن اس کی نگرانی کرے گی۔

تین روزہ ٹورنامنٹ کے دوران 56 میڈلز تقسیم کیے جائیں گے، جن میں 14 طلائی، 14 چاندی اور 28 کانسی کے تمغے شامل ہیں، ساتھ ہی اولمپک رینکنگ پوائنٹس بھی دیے جائیں گے۔مردوں کے مقابلے سات وزن کے زمروں میں ہوں گےجن میں 60 کلوگرام سے کم، 66 کلوگرام، 73 کلوگرام، 81 کلوگرام، 90 کلوگرام، 100 کلوگرام، اور 100 کلوگرام سے زائد وزن والے مرد شامل ہیں۔

خواتین کے مقابلے بھی سات وزن کے زمروں میں ہوں گے جن میں 48 کلوگرام سے کم، 52 کلوگرام، 57 کلوگرام، 63 کلوگرام، 70 کلوگرام، 78 کلوگرام، اور 78 کلوگرام سے زائد وزن والی خواتین شامل ہیں۔ابتدائی الیمنییشن راؤنڈز جمعہ، ہفتہ اور اتوار کو صبح کے اوقات میں تین میٹس پر منعقد ہوں گے، جبکہ فائنل راؤنڈز اور میڈل سرمونیز ہر دن شام 5 بجے سے ایک مرکزی میٹ پر ہوں گی، جو مباردہ ایرینا میں ہی منعقد ہوں گی۔اس ایونٹ میں مجموعی طور پر 154,000 یورو کی انعامی رقم مختص کی گئی ہے۔