اسلامی تحقیقاتی ادارے میں مولانا محمد قاسم نانوتوی کی عقلی الہیات پر توسیعی لیکچر

اسلام آباد۔19جون (اے پی پی):بین الاقوامی اسلامی یونیورسٹی اسلام آباد کے اسلامی تحقیقاتی ادارے کے زیر اہتمام مولانا محمد قاسم نانوتوی کی فکری و علمی خدمات پر ایک توسیعی لیکچر کا انعقاد کیا گیا، جس میں امریکہ کی یونیورسٹی آف سینٹ تھامس سے تعلق رکھنے والے معروف محقق ڈاکٹر فواد ایس نعیم نے خطاب کیا۔لیکچر میں مولانا محمد قاسم نانوتوی کے مذہبی و فکری تصورات کا تفصیلی جائزہ پیش کیا گیا۔ ڈاکٹر فواد ایس نعیم نے مولانا نانوتوی کے اس نظریے پر روشنی ڈالی کہ اسلام ایک ایسی مذہبی روایت ہے جو عقل، فہم اور انسانی فطرت پر استوار ہے۔ انہوں نے جدید اسلامی الہیات اور فکری مباحث میں مولانا نانوتوی کی خدمات اور اثرات کو بھی اجاگر کیا۔مقرر نے کہا کہ مولانا محمد قاسم نانوتوی نے اسلامی فکر کو عقلی بنیادوں پر استوار کرنے اور جدید فکری چیلنجز کا جواب دینے میں اہم کردار ادا کیا، جس کی اہمیت آج کے دور میں بھی برقرار ہے۔لیکچر میں بین الاقوامی اسلامی یونیورسٹی اسلام آباد کے اساتذہ، محققین، طلبہ اور علمی شخصیات نے شرکت کی۔ تقریب کے اختتام پر سوال و جواب کی نشست منعقد ہوئی، جس میں شرکاء نے مولانا نانوتوی کے افکار کی عصر حاضر میں معنویت اور اطلاق پر تبادلہ خیال کیا۔منتظمین کے مطابق یہ علمی نشست بین الاقوامی اسلامی یونیورسٹی اسلام آباد کی جانب سے علمی مکالمے، تحقیقی سرگرمیوں اور فکری مباحث کے فروغ کے عزم کا مظہر ہے، جو جامعہ کے صدر پروفیسر ڈاکٹر احمد سعد الاحمد کے وژن کے مطابق تحقیق، تدبر اور علمی فضیلت کے فروغ کی کوششوں کا حصہ ہے۔