اسلام آباد،محرم الحرام کے مرکزی جلوس کی سکیورٹی کے لیے اعلیٰ پولیس افسران کا دورہ، اہلکاروں کو خصوصی ہدایات

اسلام آباد۔25جون (اے پی پی):اسلام آباد پولیس کے سینئر سپرنٹنڈنٹ (ایس ایس پی) آپریشنز قاضی علی رضا اور سینئر سپرنٹنڈنٹ سکیورٹی/آپریشنز سلیمان ظفر نے جمعرات کو وفاقی دارالحکومت میں 9ویں محرم الحرام کے مرکزی جلوس کے مختلف انٹری پوائنٹس کا دورہ کیا اور پولیس افسران کو سکیورٹی کی ذمہ داریوں کے بارے میں بریفنگ دی۔

پولیس حکام نے اے پی پی کو بتایا کہ سینئر افسران نے مختلف انٹری پوائنٹس پر سکیورٹی انتظامات کا معائنہ کیا اور مرکزی جلوس کے پرامن اور محفوظ انعقاد کو یقینی بنانے کے لیے پولیس اہلکاروں کی تعیناتی کا جائزہ لیا۔افسران نے جلوس کے دوران ایکسیس کنٹرول، سکیورٹی چیک، ہجوم کے انتظام اور چوکسی سے متعلق اہلکاروں کو ضروری ہدایات جاری کیں۔

حکام کے مطابق انہوں نے تعینات افسران کو الرٹ رہنے، پیشہ ورانہ مہارت کے ساتھ اپنے فرائض سرانجام دینے اور سکیورٹی پلان پر سختی سے عمل درآمد کو یقینی بنانے کی ہدایت کی ۔انہوں نے فیلڈ فارمیشنز کے درمیان موثر ہم آہنگی اور جلوس اور اس کے مقرر کردہ داخلی راستوں کی بلا تعطل نگرانی پر خصوصی زور دیا ۔پولیس حکام نے مزید کہا کہ اسلام آباد پولیس محرم الحرام کے دوران فول پروف سکیورٹی کو یقینی بنانے اور امن و امان کو برقرار رکھنے کے لیے پوری طرح پرعزم ہے۔