اسلام آباد ، ایکسپریس وے کی خستہ حال سروس روڈ کی بحالی و کشادگی کے منصوبے پر ترقیاتی کام شروع

اسلام آباد۔1اگست (اے پی پی):اسلام آباد میں عوام کی سہولت کے لیے ایک اور بڑےمنصوبہ کے تحت ایکسپریس وے کی خستہ حال سروس روڈ کی بحالی و کشادگی کے منصوبے پر ترقیاتی کام شروع کر دیا گیا۔وفاقی وزیر داخلہ محسن نقوی نے ہفتہ کو منصوبہ کا دورہ کیا اور ترقیاتی کاموں کا جائزہ لیا۔ وزارت داخلہ کی جانب سے جاری پریس ریلیز کے مطابق وفاقی وزیر داخلہ نے منصوبے کو ایک سال کی جگہ چند ماہ میں مکمل کرنے کا ٹاسک دیتے ہوئے کہا کہ منصوبے کی تکمیل میں رفتار، معیار اور شفافیت پر کوئی سمجھوتہ نہیں کیا جائے گا۔

محسن نقوی نے کہا کہ منصوبے کی تکمیل سے اسلام آباد کی درجنوں آبادیوں کو فائدہ پہنچے گا اور ہائی وے پر ٹریفک کے دباؤ اور رش میں نمایاں کمی آئے گی،اسلام آباد اور راولپنڈی کے شہریوں کے لیے آمد و رفت مزید آسان اور تیز ہو جائے گی۔ انہوں نے کہا کہ پرانی سروس روڈ کی حالت زار دیکھ کر انتہائی افسوس ہوا ہے، کوئی سوچ بھی نہیں سکتا کہ ایسی خراب سروس روڈ اسلام آباد کا حصہ ہے۔ محسن نقوی نے کہا کہ اسلام آباد کے ہر علاقے کی ترقی اور شہریوں کو معیاری سہولیات کی فراہمی ترجیح ہے۔

عوامی مشن کی تکمیل میں کوئی کوتاہی نہیں کی جائے گی۔ وفاقی وزیر کو بریفنگ کے دوران بتایا گیا کہ منصوبہ 8.25 کلومیٹر طویل ہوگا، فیض آباد سے کورال چوک تک مکمل کیا جائے گا۔منصوبے میں 6 رویہ سڑک (دونوں اطراف تین تین)، ایک انڈر پاس اور ایک فلائی اوور شامل ہیں۔ اس موقع پر وفاقی وزیر داخلہ کو منصوبے کے مختلف پہلوؤں پر تفصیلی بریفنگ دی گئی۔اس موقع پر چیف کمشنر اسلام آباد ، ڈی سی اسلام آباد اور دیگر متعلقہ افسران بھی موجود تھے۔