اسلام آباد میں سکیورٹی کو یقینی بنانے کے لیے 3500 افسران اور اہلکار تعینات

اسلام آباد۔13مارچ (اے پی پی):اسلام آباد پولیس (آئی سی ٹی پی)نے جمعہ کے اجتماعات اور یوم القدس کے جلوسوں کے دوران سکیورٹی کو یقینی بنانے کے لیے وفاقی دارالحکومت میں 3500 سے زائد افسران اور اہلکار تعینات کیے ہیں۔

ایک عہدیدار نےاے پی پی کو بتایا کہ اسلام آباد میں سکیورٹی کے فول پروف انتظامات کیے گئے ہیں۔ انہوں نے کہا کہ فیصل مسجد کے ساتھ ساتھ دیگر مساجد اور امام بارگاہوں کے اطراف سکیورٹی کے سخت انتظامات کیے گئے ہیں جبکہ یوم القدس ریلیوں کے لیے بھی سکیورٹی کے خصوصی انتظامات کیے گئے ہیں۔ ڈی آئی جی محمد جواد طارق نے ایک بیان میں کہا ہے کہ شہر کے تمام داخلی اور خارجی راستوں پر چیکنگ مزید سخت کر دی گئی ہے اور خصوصی چوکیاں بھی قائم کر دی گئی ہیں۔

انہوں نے کہا کہ امن و امان کو برقرار رکھنے کے لیے شہر بھر میں پولیس کا گشت جاری ہے، شہریوں کے جان و مال کے تحفظ کو یقینی بنانا اسلام آباد پولیس کی اولین ترجیح ہے۔