اسلام آباد ٹیکنوپولس پراجیکٹ کے اگلے مرحلے کی لاگت 1.54 ارب روپے مقرر

اسلام آباد۔6اپریل (اے پی پی):کابینہ ڈویژن نے پبلک سیکٹر ڈویلپمنٹ پروگرام(پی ایس ڈی پی)27 ۔ 2026 کے تحت اسلام آباد ٹیکنوپولس منصوبے کے اگلے مرحلے کے لئے 1,543 ملین روپے کی منظوری طلب کر لی ہےجو وفاقی دارالحکومت کو جدت اور ٹیکنالوجی کا مرکز بنانے کی کوششوں کو مزید تقویت دینے کا عندیہ ہے۔ویلتھ پاکستان کو دستیاب دستاویزات کے مطابق منصوبے کی کل منظور شدہ لاگت 1.98 ارب روپے ہے جس میں سے 30 جون 2025 تک 303.7 ملین روپے خرچ کیے جا چکے ہیں۔ پی ایس ڈی پی 26-2025 کے تحت اس منصوبے کے لئے 138.28 ملین روپے مختص کئے گئے تھے۔

منصوبے کا مقصد جدید ترین انفراسٹرکچر کی فراہمی ہے جس میں باؤنڈری وال، 132 کے وی بجلی کی ترسیلی لائن، پانی کی ترسیلی لائن، گیس لائن، نکاسی آب کے کلورٹس اور نکاسی آب کے نظام کی بہتری شامل ہے۔یہ منصوبہ ہائی ٹیک اور جدید حلوں کی حوصلہ افزائی کے ذریعے پاکستان کی ٹیکنالوجی برآمدات میں اضافے کے لئے ایک محرک کا کردار بھی ادا کرے گا جبکہ کاروباری سرگرمیوں کو فروغ دینے میں مدد دے گا۔یہ اقدام عالمی ٹیکنالوجی مراکز سے علم کی منتقلی کو فروغ دے کر اور ٹیکنالوجی برآمدات کو بڑھا کر پاکستان کے معاشی منظرنامے کو تبدیل کرنے پر مرکوز ہے۔

مزید برآں اس کا مقصد قومی اور بین الاقوامی سطح پر روزگار کے مواقع پیدا کرنا، ہنر مند اور تربیت یافتہ افرادی قوت تیار کرنا، براہ راست غیر ملکی سرمایہ کاری میں اضافہ کرنا اور بالآخر قومی آمدنی میں بہتری لانا ہے۔اگر اس منصوبے پر مؤثر انداز میں عملدرآمد کیا گیا تو یہ ملک کی عالمی مسابقت میں اضافہ کرے گا اور پاکستان کو ٹیکنالوجی جدت کے شعبے میں ایک علاقائی رہنما کے طور پر سامنے لائے گا۔