اسلام آباد پولیس کا کومبنگ اور سرچ آپریشن، 4غیر قانونی مقیم افغان شہریوں سمیت 88 مشتبہ افراد گرفتار

اسلام آباد۔5اپریل (اے پی پی):اسلام آباد کیپٹل ٹیریٹری (آئی سی ٹی) پولیس نے وفاقی دارالحکومت میں بڑے پیمانے پر کومبنگ اور سرچ آپریشنز شروع کیے ہیں، جرائم پیشہ عناصر اور غیر قانونی مقیم افراد کے خلاف مہم کے دوران 4 غیر قانونی مقیم افغان شہریوں سمیت 88 مشتبہ افراد کو حراست میں لیا گیا ہے۔پولیس حکام نے اتوار کو اے پی پی کو بتایا کہ یہ کارروائیاں زونل ایس پیز کی نگرانی میں کی گئیں۔انہوں نے کہا کہ موثر چیکنگ کو یقینی بنانے کے لیے لیڈی پولیس اہلکاروں نے بھی کارروائیوں میں حصہ لیا۔آپریشنز کے دوران مجموعی طور پر 2679 افراد اور 1133 گھرانوں کی چیکنگ کی گئی جبکہ 338 دکانوں اور 98 ہوٹلوں کی بھی چیکنگ کی گئی۔

انہوں نے بتایا کہ مہم کے دوران 958 موٹر سائیکلوں اور 356 گاڑیوں کی جانچ کی گئی۔انہوں نے کہا کہ چار غیر قانونی افغان شہریوں سمیت 88 مشکوک افراد کو 74 موٹر سائیکلوں کے ساتھ مزید تصدیق کے لیے متعلقہ تھانوں میں منتقل کر دیا گیا ہے۔انہوں نے کہا کہ آئی جی اسلام آباد نے جرائم کے خاتمے اور شہریوں کے تحفظ کو یقینی بنانے کے لیے ضلع بھر میں گرینڈ سرچ آپریشن کرنے کی خصوصی ہدایات جاری کی ہیں۔پولیس حکام نے شہریوں پر زور دیا کہ چیکنگ کے دوران پولیس کے ساتھ تعاون کریں اور کسی بھی مشکوک سرگرمی کی فوری اطلاع دیں۔