اعلیٰ سطحی اسٹریٹجک رہنمائی چین شمالی کوریا تعلقات کی سب سے بڑی خوبی ہے، چینی صدر

بیجنگ۔8جون (اے پی پی):چین کے صدر شی جن پنگ نے کہا ہے کہ اعلیٰ سطحی سٹریٹجک رہنمائی چین شمالی کوریا تعلقات کی سب سے بڑی خوبی ہے اور مشترکہ تقدیر کی حامل روایتی دوستی چین شمالی کوریا تعلقات کی مضبوط بنیاد ہے ۔سی جی ٹی این کے مطابق شمالی کوریا کے سرکاری دورے کے موقع پر کمیونسٹ پارٹی آف چائنا کی مرکزی کمیٹی کے جنرل سیکرٹری اور چین کے صدر شی جن پنگ کا ایک اہم مضمون شمالی کوریا کے اخبار ” رودنگ سیمون” میں شائع ہوا جس کا عنوان ” ماضی کی روایت کو آگے بڑھاتے ہوئے شانہ بشانہ چلیں اور چین-شمالی کوریا روایتی دوستی کا نیا باب رقم کریں” ہے۔مضمون میں صدر شی جن پنگ نے کہا کہ رواں سال "چین-شمالی کوریا باہمی تعاون اور دوستی کے معاہدے” پر دستخط کی 65ویں سالگرہ ہے۔ شی جن پنگ شمالی کوریا کی ورکرز پارٹی کے جنرل سیکرٹری اور ریاستی امور کی کونسل کے چیئرمین کم جونگ اُن کی دعوت پر شمالی کوریا کا سرکاری دورہ کر رہے ہیں ۔ انہوں نے کہا کہ سات برس بعد شمالی کوریا کا دوبارہ دورہ کرتے ہوئے وہ کم جونگ اُن کے ساتھ دونوں ممالک کی روایتی دوستی اور دوطرفہ تعلقات کے مستقبل پر تبادلۂ خیال کے منتظر ہیں ۔ مضمون میں کہا گیا ہے کہ اعلیٰ سطحی اسٹریٹجک رہنمائی چین-شمالی کوریا تعلقات کی سب سے بڑی خوبی ہے۔سوشلزم پر مبنی مشترکہ مقصد چین-شمالی کوریا تعلقات کی واضح خصوصیت ہے، مشترکہ تقدیر کی حامل روایتی دوستی چین-شمالی کوریا تعلقات کی مضبوط بنیاد ہے جبکہ اعلیٰ سطحی اسٹریٹجک تعاون چین-شمالی کوریا تعلقات کی عصری اہمیت کی عکاسی کرتا ہے۔انہوں نے کہا کہ چین کی پارٹی اور حکومت کے لیے چین-شمالی کوریا تعلقات کا تحفظ، استحکام اور فروغ ہمیشہ ایک غیر متزلزل پالیسی رہی ہے۔ چین، شمالی کوریا کے ساتھ مل کر تزویراتی نقطۂ نظر سے دوطرفہ تعلقات کو آگے بڑھانے اور انہیں نئے دور کے تقاضوں کے مطابق مزید ترقی دینے کا خواہاں ہے۔مضمون کے مطابق اسٹریٹجک رابطوں کو گہرا کرنا اور چین-شمالی کوریا تعلقات کی درست سمت کو یقینی بنانا ؛ باہمی تبادلوں اور تعاون کو بڑھانا اور دونوں ممالک کے سوشلسٹ نصب العین کو مستحکم اور دور رس تناظر میں فروغ دینا، عملی تعاون کو وسعت دینا اور دونوں ممالک کے عوام کی فلاح و دوستی کو مسلسل بڑھانا، اور کثیرالجہتی ہم آہنگی کو فروغ دینا اور بین الاقوامی انصاف اور راستبازی کا مضبوطی سے دفاع کرنا کلیدی اہمیت کا حامل ہے۔مضمون میں لکھا گیا ہے کہ ہم شمالی کوریا کے ساتھیوں کے ساتھ ہاتھ ملا کر آگے بڑھنا اور ایک نیا باب لکھنا چاہتے ہیں، تاکہ خطے اور دنیا کے امن و استحکام اور ترقی و خوشحالی میں مزید اہم کردار ادا کیا جا سکے۔