اعلیٰ و ثانوی تعلیمی بورڈ کامیٹرک پارٹ ون(کلاس نہم) میں ریگولر داخلہ اور آن لائن رجسٹریشن کے شیڈول کا اعلان

فیصل آباد ۔ 18 اپریل (اے پی پی):اعلیٰ و ثانوی تعلیمی بورڈفیصل آباد نے میٹرک پارٹ ون،کلاس نہم سیشن2025-27 میں ریگولر داخلہ اور آن لائن رجسٹریشن کے شیڈول کا اعلان کیا ہے ۔بورڈ آف انٹرمیڈیٹ اینڈ سیکنڈری ایجوکیشن فیصل آباد کے شعبہ تعلقات عامہ کے ترجمان ساجد نقوی کے مطابق رجسٹریشن کیلئے متعلقہ طالبعلم یا طالبہ کی عمر یکم اگست 2025 کو 11 سال2 ماہ ہونا لازمی ہے۔

بغیر لیٹ فیس داخلہ جماعت نہم (میٹرک پارٹ ون)آج سے 29 مئی 2025 تک، اور بورڈ کو واجب الادا 600 روپے لیٹ فیس فی طالبعلم کے ساتھ داخلہ 30 مئی 2025 سے 13 جون 2025 تک ہوگا۔ انہوں نے بتایا کہ اس کے علاوہ رجسٹریشن فیس 1000 روپے فی طالبعلم ناقابل واپسی،پراسیسنگ فیس800 روپے فی طالبعلم ناقابل واپسی اورسپورٹس فیس،سکالر شپ فنڈ300 روپے فی طالبعلم ناقابل واپسی بھی ادا کرنا ہوں گے۔

انہوں نے بتایا کہ مڈل کلاس کا نتیجہ تاخیر سے نکلنے کی صورت میں بشرطیکہ اس تاخیر کا ذمہ دار طالبعلم نہ ہوتاریخ اشاعت مڈل رزلٹ سے 15یوم کے اندر کلاس نہم میں داخلہ کیلئے رجوع کیا جاسکتا ہے۔ انہوں نے کہاکہ امیدوار کا ب فارم نمبر ہی رجسٹریشن نمبر الاٹ ہوگا اسلئے انتہائی احتیاط سے ب فارم نمبر کا اندراج کیا جا ئے ورنہ غلط اندراج کی صورت میں بورڈ ذمہ دار نہ ہوگا۔

Short Link: https://urdu.app.com.pk/urdu/?p=583978