اقوام متحدہ میں پاکستان کا پائیدار، محفوظ اور جامع شہری ترقی کے عزم کا اعادہ

اقوام متحدہ۔18جولائی (اے پی پی):وزیراعظم یوتھ پروگرام کے چیئرمین رانا مشہود احمد خان نے اقوام متحدہ کی جنرل اسمبلی کے اعلیٰ سطحی اجلاس سے خطاب کرتے ہوئے پاکستان کے پائیدار، جامع اور موسمیاتی تبدیلی سے ہم آہنگ شہری ترقی کے عزم کا اعادہ کیا ہے۔انہوں نے نیو اربن ایجنڈا کے وسط مدتی جائزہ اجلاس سے خطاب کرتے ہوئے کہا کہ تیز رفتار شہری آبادی میں اضافے کے باعث رہائش، ٹرانسپورٹ، عوامی تحفظ اور ماحولیات جیسے شعبوں پر دباؤ بڑھ رہا ہے، جس کے پیش نظر عالمی برادری کو اپنے وعدوں کی تجدید کرنا ہوگی۔رانا مشہود احمد خان نے کہا کہ پاکستان موسمیاتی تبدیلی سے پیدا ہونے والے چیلنجز سے نمٹنے کے لیے اقوام متحدہ کے ادارے **یو این ہیبی ٹیٹ** کے تعاون سے قومی شہری حکمتِ عملی (نیشنل اربن اسٹریٹجی) تیار کر رہا ہے، تاکہ شہری منصوبہ بندی میں ابتدا ہی سے موسمیاتی لچک کو شامل کیا جا سکے۔انہوں نے بتایا کہ 2025 کے تباہ کن شہری اور دریائی سیلاب، جن میں ملک بھر میں ایک ہزار سے زائد افراد جان کی بازی ہار گئے تھے، کے بعد حکومت نے متاثرہ خاندانوں کے لیے چار لاکھ سے زائد مکانات کی تعمیر نو کا عمل شروع کیا ہے، جس میں جدید اور محفوظ تعمیراتی معیار کو ترجیح دی جا رہی ہے۔چیئرمین وزیراعظم یوتھ پروگرام نے کہا کہ حکومت کم لاگت اور ماحول دوست پبلک ٹرانسپورٹ کے فروغ، بینظیر انکم سپورٹ پروگرام (بی آئی ایس پی) کے ذریعے نو ملین سے زائد خاندانوں کو سماجی تحفظ کی فراہمی اور سیف سٹی منصوبوں کے دائرہ کار کو وسعت دینے کے لیے بھی اقدامات کر رہی ہے، جن میں جدید نگرانی کے نظام اور مربوط کمانڈ سینٹرز کا قیام شامل ہے۔انہوں نے کہا کہ پاکستان کی تقریباً 67 فیصد آبادی 30 سال سے کم عمر نوجوانوں پر مشتمل ہے، اس لیے تعلیم، ہنر مندی، روزگار اور کاروباری مواقع کی فراہمی کو شہری ترقی کا بنیادی جزو بنایا جا رہا ہے تاکہ شہری آبادی میں اضافہ معاشی خوشحالی کا ذریعہ بن سکے۔رانا مشہود احمد خان نے اس موقع پر وزیراعظم شہباز شریف کی قیادت میں شروع کیے گئے **”پُرعزم پاکستان”** اقدام کا بھی ذکر کیا، جس کے تحت قومی اور بین الاقوامی شراکت داروں کے تعاون سے نوجوانوں کو ہنر، روزگار اور کاروباری مواقع سے جوڑا جا رہا ہے۔انہوں نے کہا کہ پاکستان پائیدار شہری ترقی کے لیے اپنے تجربات عالمی برادری کے ساتھ شیئر کرنے اور عوام دوست عملی حل تلاش کرنے کے لیے تمام رکن ممالک کے ساتھ تعاون جاری رکھنے کے لیے تیار ہے۔ انہوں نے امید ظاہر کی کہ نیو اربن ایجنڈا کے وسط مدتی جائزے کے مثبت نتائج موجودہ اور آئندہ نسلوں کے معیارِ زندگی کو بہتر بنانے میں مددگار ثابت ہوں گے۔