اقوام متحدہ نے 2027 سے 2036 کو ’’آئندہ نسلوں کے لیے امن کے فروغ کا بین الاقوامی عشرہ‘‘ قرار دے دیا

اقوام متحدہ۔26جون (اے پی پی):اقوام متحدہ نے 2027 سے 2036 کو ’’آئندہ نسلوں کے لیے امن کے فروغ کا بین الاقوامی عشرہ‘‘ قرار دے دیا۔شنہوا کے مطابق اقوام متحدہ کی جنرل اسمبلی نے 2027 سے 2036 تک کی مدت کو **”آئندہ نسلوں کے لیے امن کے فروغ کا بین الاقوامی عشرہ” قرار دینے کی قرارداد بھاری اکثریت سے منظور کر لی۔

آذربائیجان، بحرین، گیبون، قازقستان، کرغزستان، موریطانیہ، پرتگال، سنگاپور، تاجکستان، ترکمانستان اور ازبکستان کی جانب سے پیش کی گئی قرارداد کے حق میں 153 ممالک نے ووٹ دیا، جبکہ ایک ملک نے مخالفت کی اور کسی بھی ملک نے رائے شماری میں غیر حاضر رہنے کا انتخاب نہیں کیا۔

قرارداد کے مطابق اس بین الاقوامی عشرے کا مقصد دنیا میں امن کا فروغ، مکالمے اور مفاہمت کی حوصلہ افزائی، مختلف نسلوں کے درمیان روابط کو مضبوط بنانا اور بچوں، نوجوانوں اور بزرگوں کی مؤثر شمولیت کو فروغ دینا ہے تاکہ آئندہ نسلوں کی ضروریات اور مفادات کو پالیسی سازی اور فیصلہ سازی کے عمل میں مدنظر رکھا جا سکے۔

قرارداد میں اقوام متحدہ کے رکن ممالک، اقوام متحدہ کے اداروں، علاقائی اور بین الاقوامی تنظیموں، سول سوسائٹی، غیر سرکاری تنظیموں اور دیگر متعلقہ فریقوں پر زور دیا گیا ہے کہ وہ اس بین الاقوامی عشرے کے اہداف کے حصول کے لیے تعاون کریں۔قرارداد میں واضح کیا گیا ہے کہ اس کے تحت ہونے والی سرگرمیوں کے اخراجات رضاکارانہ مالی تعاون سے پورے کیے جائیں گے۔