اقوام متحدہ کی جمیکا کے سمندری طوفان سے متاثرہ علاقوں کیلئے عالمی امداد کی اپیل

اقوام متحدہ۔3نومبر (اے پی پی):اقوام متحدہ کے سیکرٹری جنرل انتونیو گوتریس نے جمیکا کے عوام سے سمندری طوفان ملیسا کی تباہ کاریوں کے بعد یکجہتی کا اظہار کرتے ہوئے عالمی برادری سے اپیل کی ہے کہ وہ بڑے پیمانے پر امدادی کارروائیوں میں حصہ لے۔اماراتی نیوز ایجنسی ’’وام‘‘ کے مطابق جمیکا کے وزیرِاعظم اینڈریو ہولنس سے ٹیلی فونک گفتگو کے بعد جاری بیان میں اقوام متحدہ کے سیکرٹری جنرل انتونیو گوتریس نے کہا کہ ملک ایک خطرناک درجہ 5 کے طوفان کے اثرات سے نبردآزما ہے جس نے موسلا دھار بارشوں، طغیانی اور تباہ کن سیلابوں کے ذریعے بڑے پیمانے پر نقصان پہنچایا ہے۔

انہوں نے کہا کہ جانی و مالی نقصان کے ازالے کیلئے بڑے پیمانے پر وسائل کی فراہمی ناگزیر ہے تاکہ متاثرہ افراد کو ریلیف فراہم کیا جا سکے۔اقوام متحدہ کے ایمرجنسی ریلیف کوآرڈی نیٹر ٹام فلیچر نے اعلان کیا ہے کہ سنٹرل ایمرجنسی ریسپانس فنڈ سے 40 لاکھ امریکی ڈالر جاری کیے گئے ہیں تاکہ جمیکا میں انسانی ہمدردی پر مبنی امدادی کارروائیوں میں وسعت دی جا سکے۔ ان فنڈز سے متاثرہ علاقوں میں خوراک، پناہ گاہیں، صاف پانی اور طبی امداد فراہم کی جائے گی۔

یونیسیف نے بتایا کہ طوفان سے پورے کیریبین میں 7 لاکھ سے زائد بچے متاثر ہوئے ہیں۔ طوفان نے جمیکا کے علاوہ کیوبا میں بھی اثر ڈالا اور مغربی ہیٹی میں بھی تباہی پھیلائی ہے۔یونیسیف جمیکا کی حکومت کے ساتھ مل کر 2 لاکھ 84 ہزار سے زائد بچوں تک فوری غذائی امداد، محفوظ پانی، صفائی و حفظانِ صحت کی سہولتیں اور ذہنی صحت کے تعاون کو یقینی بنانے کے اقدامات کر رہا ہے۔