امارتِ شارجہ کے حاکم شیخ ڈاکٹر سلطان بن محمد القاسمی کی نئی تصنیف "مجمّع التواریخ” شائع

شارجہ۔30جولائی (اے پی پی):امارتِ شارجہ کے حاکم شیخ ڈاکٹر سلطان بن محمد القاسمی کی نئی تصنیف "مجمّع التواریخ” شائع ہو گئی۔اماراتی نیوز ایجنسی وام کے مطابق شیخ ڈاکٹر سلطان بن محمد القاسمی کی کتاب تاریخ پر مبنی ایک جامع مجموعہ ہے، جس میں 45 جلدوں پر مشتمل مستند اور مستدل تاریخی مواد شامل کیا گیا ہے۔کتاب کی اشاعت کے باضابطہ اعلان کے موقع پر انہوں نے کہا کہ یہ کتابی سلسلے خلیجی ممالک اور جزیرہ نما عرب کے محققین و مؤرخین کے لیے ایک بیش قیمت تحفہ ہے ۔

انہوں نے یہ بھی واضح کیا کہ یہ تاریخی مجموعہ آنے والے "شارقہ انٹرنیشنل بُک فیئر” سے قبل قارئین کے لیے دستیاب ہوگا۔اپنی گفتگو میں شیخ ڈاکٹر سلطان بن محمد القاسمی نے شارجہ کی ثقافتی ورثے کے تحفظ سے متعلق پختہ عزم کا اعادہ کیا اور اس امر پر زور دیا کہ شارجہ میں آثارِ قدیمہ کی بحالی اور ان کے تحفظ کے لیے مسلسل اقدامات کیے جا رہے ہیں۔

انہوں نے بتایا کہ کلبا میں قاید بن عدوان القاسمی قلعہ کی بحالی کا کام جاری ہے جبکہ ال قواسم قلعہ کی تعمیرِ نو بھی کی جا رہی ہے، جس میں تاریخی نوادرات اور پرتگالی دور کی بنیادوں کو محفوظ رکھتے ہوئے تعمیراتی سرگرمیاں عمل میں لائی جا رہی ہیں۔