اسلام آباد ۔ 13 جون (اے پی پی) امریکی بحریہ کا جہاز ”میسن“ پاکستان کے دورہ پر کراچی پہنچ گیا جہاں پر جہاز کا روایتی انداز میں استقبال کیا گیا۔ ترجمان پاک بحریہ کے مطابق دورے کے دوران دونوں ممالک کے جہازوں کے عملے کے درمیان پیشہ ورانہ امور پر تبادلہ خیال سمیت مختلف سرگرمیوں کا انعقاد کیا گیا۔ دونوں ممالک کی بحری افواج سمندر میں آزادانہ تجارتی نقل و حمل اور خطے میں میری ٹائم سکیورٹی کے قیام میں کوشاں ہیں۔ علاقائی میری ٹائم سکیورٹی کے لیے پاک بحریہ 2004سے کولیشن میری ٹائم کمپین میں سرگرم کردار ادا کر رہی ہے۔اس کے ساتھ ساتھ پاک بحریہ نے ریجنل میری ٹائم سکیورٹی پٹرول کا آغازبھی کیا جس کا مقصد خطے میں میری ٹائم سکیورٹی کو یقینی بنانا ہے۔امریکی نیول بحری جہاز کے دورے سے دونوں ممالک کی بحری افواج کے مابین تعلقات مستحکم اور مضبوط ہو ں گے۔
