امریکی صدر ڈونلڈ ٹرمپ کی طرف سے 7بھارتی کمپنیوں پر پابندیاں عائد،بھارتی کمپنیاں حساس ٹیکنالوجی کے غیر قانونی حصول ، غیر مجاز مقاصد کیلئے استعمال میں ملوث پائی گئیں

واشنگٹن۔31جولائی (اے پی پی):امریکی صدر ڈونلڈ ٹرمپ نے بھارت پر25فیصد ٹیرف اور جرمانہ عائد کرنے کے علاوہ7بھارتی کمپنیوں پر بھی پابندیاں عائد کردی ہیں ۔کشمیرمیڈیاسروس کے مطابق امریکی محکمہ خارجہ نے بھارتی کمپنیوں پر پابندیوں کا اعلان کرتے ہوئے کہاہے کہ یہ کمپنیاں حساس ٹیکنالوجی کے غیر قانونی حصول اور ممکنہ طور پر انکے غیر مجاز مقاصد کیلئے استعمال میں ملوث پائی گئی ہیں۔امریکی حکام کے مطابق ان کمپنیوں پر الزام ہے کہ وہ امریکی ساختہ پرزہ جات اور جدید ٹیکنالوجی کو غیر شفاف طریقوں سے حاصل کر رہی تھیں، جن کا تعلق ممکنہ طور پر دوہرے استعمال یعنی عسکری اور سویلین دونوں مقاصد سے ہو سکتا ہے۔

امریکا کی جانب سے ان کمپنیوں کو Entity List میں شامل کر دیا گیا ہے، جس کے بعد انکے ساتھ کسی بھی امریکی کمپنی کو کاروباری لین دین کے لیے حکومتی اجازت درکار ہوگی۔امریکی محکمہ خارجہ کے مطابق ان اقدامات کا مقصد امریکی قومی سلامتی اور عالمی برآمدی قوانین کی خلاف ورزیوں کوروکناہے۔ پابندیوں کے باعث ان بھارتی کمپنیوں کی عالمی سطح پر تجارتی سرگرمیاں محدود ہونے کا خدشہ ہے۔ بھارتی حکومت کی جانب سے تاحال اس پابندی پرباضابطہ ردعمل سامنے نہیں آیا، تاہم سفارتی ذرائع کے مطابق نئی دہلی میں اس پیشرفت پر تشویش پائی جا رہی ہے۔