انسانی ہمدردی متاثرین کے وقار، تحفظ اور انصاف کو یقینی بنانے کا تقاضا کرتی ہے، اعظم نذیر تارڑ

اسلام آباد۔19اگست (اے پی پی):وفاقی وزیر برائے قانون و انصاف و انسانی حقوق سینیٹر اعظم نذیر تارڑ نے انسانی ہمدردی کے عالمی دن کے موقع پر دنیا بھر کے امدادی کارکنان کو خراجِ تحسین پیش کرتے ہوئے کہا ہے کہ مشکل اور خطرناک حالات میں امدادی کارکنان کی خدمات قابلِ تحسین ہیں، جو انسانیت، ہمدردی اور بے لوث خدمت کی روشن مثال ہے،انسانی ہمدردی صرف فوری امداد کا نام نہیں بلکہ متاثرین کے وقار، تحفظ اور انصاف کو یقینی بنانے کا تقاضا بھی کرتی ہے۔ انسانی ہمدردی کے عالمی دن کے موقع پر اپنے پیغام میں وفاقی وزیر نے کہا کہ قدرتی آفات اور بحرانوں کے دوران امدادی کارکنان کا کردار انتہائی قابلِ قدر ہے، انسانی ہمدردی اور احترامِ انسانیت ہماری مشترکہ اخلاقی ذمہ داری ہے، بحرانوں کے دوران متاثرہ افراد کے بنیادی حقوق کا تحفظ یقینی بنانا ضروری ہے۔انہوں نے کہا کہ خواتین، بچوں، معذور افراد اور دیگر کمزور طبقات کا تحفظ ترجیح ہونی چاہیے، جبکہ ہنگامی حالات میں ریاست کو متاثرہ افراد کو بلاامتیاز تحفظ فراہم کرنا ہوگا، انسانی ہمدردی صرف فوری امداد کا نام نہیں بلکہ متاثرین کے وقار، تحفظ اور انصاف کو یقینی بنانے کا تقاضا بھی کرتی ہے۔اعظم نذیر تارڑ نے کہا کہ ریاستی اداروں، سول سوسائٹی، طبی عملے اور رضاکاروں کی خدمات قابلِ تحسین ہیں، بحرانوں میں کوئی فرد بے یارومددگار نہ رہے، یہ ہم سب کی اجتماعی ذمہ داری ہے۔وفاقی وزیر نے کہا کہ پاکستان انسانی حقوق، احترامِ انسانیت اور قانون کی حکمرانی کے اصولوں پر قائم ہے، انسانی ہمدردی کے مؤثر نظام میں امداد کے ساتھ متاثرین کی بحالی بھی ضروری ہے اور انہیں انصاف و بنیادی سہولیات تک رسائی یقینی بنانا ہوگی۔انہوں نے کہا کہ انسانی ہمدردی عالمی تعاون، یکجہتی اور مشترکہ ذمہ داری کا تقاضا کرتی ہے۔ امدادی کارکنان بحرانوں میں امید، حوصلے اور انسانیت کی علامت ہیں۔وفاقی وزیر نے اس عزم کا اعادہ کیا کہ پاکستان ضرورت مند انسانوں کی مدد اور احترامِ انسانیت کے اصول پر قائم ہے۔ مشکل کی گھڑی میں متاثرہ افراد کے ساتھ کھڑا ہونا انسانیت کا تقاضا ہے۔ انہوں نے تمام امدادی کارکنان کی خدمات کو قدر کی نگاہ سے دیکھنے کا اظہار کیا