انسپکٹر جنرل آف پولیس اسلام آباد کی زیر صدارت سنٹرل پولیس آفس میں اجلاس کا انعقاد

اسلام آباد۔7جون (اے پی پی):انسپکٹر جنرل آف پولیس اسلام آباد سید علی ناصر رضوی کی زیر صدارت سنٹرل پولیس آفس میں اجلاس منعقد ہوا۔ اجلاس میں ایس ایس پی کاونٹر ٹیررازم ڈیپارٹمنٹ اسلام آباد سعود خان اور اے آئی جی لیگل طاہر کاظم نے شرکت کی۔

اس موقع پروفاقی دارالحکومت کی مجموعی سکیورٹی صورتحال، انسداد دہشت گردی کے جاری اقدامات، زیر التواءقانونی امور اور پولیس فورس کی پیشہ ورانہ استعداد کار کو مزید موثر بنانے سے متعلق تفصیلی تبادلہ خیال کیا گیا۔اجلاس کے دوران انسداد دہشت گردی کے حوالے سے جاری آپریشنز، انٹیلی جنس بیسڈ کارروائیوں، سکیورٹی چیلنجز اور درپیش خطرات کا تفصیلی جائزہ بھی لیا گیا۔اس موقع پر قانونی معاملات میں پیش رفت، مقدمات کی موثر پیروی اور عدالتی کارروائیوں کو مزید بہتر بنانے کے مختلف پہلووں پر بھی غور کیا گیا۔ آئی جی اسلام آباد سید علی ناصر رضوی نے ہدایت جاری کرتے ہوئے کہا کہ بدلتے ہوئے سکیورٹی حالات کے پیش نظر انسداد دہشت گردی کے فریم ورک کو مزید مضبوط اور موثر بنایا جائے۔ انہوں نے مزید کہا کہ تمام متعلقہ اداروں کے درمیان انٹیلی جنس کوآرڈینیشن کو مزید بہتر بنایا جائے تاکہ ممکنہ خطرات کی بروقت نشاندہی اور موثر تدارک کو یقینی بنایا جا سکے۔ انہوں نے مزید ہدایت کی کہ زیر التواءقانونی معاملات کو ترجیحی بنیادوں پر نمٹانے کیلئے مربوط اور جامع حکمت عملی اپنائی جائے تاکہ انصاف کی بروقت فراہمی اور مقدمات کے موثر تصفیے کو یقینی بنایا جا سکے۔ آئی جی اسلام آباد نے اس امر پر بھی زور دیا کہ پولیس فورس کی پیشہ ورانہ صلاحیتوں میں مزید اضافہ، جدید تربیت اور استعداد کار کی بہتری کے ذریعے عوام کو اعلیٰ معیار کی پولیسنگ خدمات فراہم کی جائیں، شہریوں کے جان و مال کے تحفظ، امن و امان کے قیام اور دہشت گردی کے ہر ممکن خطرے کے سدباب کیلئے اسلام آباد پولیس تمام دستیاب وسائل بروئے کار لائے گی اور مربوط اقدامات کے ذریعے وفاقی دارالحکومت کو محفوظ اور پرامن بنانے کیلئے اپنی کوششیں جاری رکھے گی۔