انسپکٹر جنرل پولیس نے اسلام آباد پولیس میں 7 افسران کی اگلے رینک میں ترقی کی منظوری دے دی

اسلام آباد۔3جنوری (اے پی پی):انسپکٹر جنرل آف پولیس (آئی جی پی) سید علی ناصر رضوی نے اسلام آباد پولیس میں 7 افسران کی اگلے رینک میں ترقی کی منظوری دے دی ہے۔ایک پولیس اہلکار نے اے پی پی کوبتایا کہ آئی جی پی نے متعلقہ حکام کو ہدایت کی ہے کہ ترقی کا عمل بغیر کسی تاخیر کے جاری رکھا جائےاور جن افسران کی ترقی کا حق ہے انہیں ترجیحی بنیادوں پر اور سختی سے قواعد کے مطابق ترقی دی جائے۔

آئی سی ٹی پولیس نے 2025 میں ایک تاریخی ریکارڈ کے طور پر 1,059 افسران کو اعلیٰ رینکس پر ترقی دی جو محکمے کی اپنے اہلکاروں کی فلاح و بہبود، حوصلہ افزائی اور ان کی ترقی پر توجہ کی عکاسی کرتا ہے۔آئی جی پی سید علی ناصر رضوی نے کہا کہ اسلام آباد پولیس کے افسران عوام کی خدمت اور امن و امان کے لیے دن رات مصروف عمل رہتے ہیں۔انہوں نے تمام افسران پر زور دیا کہ وہ اپنے فرائض اخلاص، ایمانداری اور عوامی خدمت کے جذبے کے ساتھ انجام دیں۔انہوں نے کہا کہ بروقت ترقیاں اور میرٹ کی شناخت اسلام آباد پولیس کے اندر ادارہ جاتی اصلاحات کے حصہ کے طور پر جاری رہیں گی۔