انٹرڈویژن کھیلتا پنجاب ہاکی ٹورنامنٹ کا افتتاحی میچ دانش کلب میانوالی نے جیت لیا

سرگودھا۔ 27 نومبر (اے پی پی):انٹرڈویژن کھیلتا پنجاب ہاکی ٹورنامنٹ کی افتتاحی تقریب علی عامر ہاکی گراؤنڈسرگودھامیں منعقد کی گئی جس کی مہمان خصوصی اسسٹنٹ کمشنر آمنہ احسان تارڑ تھیں۔جن کا استقبال ڈسٹرکٹ سپورٹس آفیسر صائمہ منظور، تحصیل سپورٹس آفیسر شہر یار سیال، تحصیل سپورٹس آفیسر عظمت اقبال اور شیخ فاروق نے کیا۔اس مو قع پر اسسٹنٹ کمشنر آمنہ احسان تارڑکو تمام ڈویژن بھر سے آنیوالی مہمان ٹیموں کا تعارف کروایا گیا۔ٹورنا منٹ کا افتتاحی میچ فاطمہ کلب سرگودھا اور دانش کلب میانوالی کے درمیان کھیلا گیا جو دانش کلب میانوالی نے سخت مقابلے کے بعد 2کے مقابلے میں 3 سے جیت لیا۔

اس موقع پراسسٹنٹ کمشنر کا کہنا تھا کہ سپورٹس کے ایک نئے دور کا آغاز ہو گیا ہے ۔کھیلتا پنجاب گیمز میں نوجوانوں کو اپنا ٹیلنٹ سامنے لانے کا بہترین موقع فراہم کیا گیا ہے۔ پنجاب حکومت تعلیم کے ساتھ ساتھ کھیلو ں کے فروغ کیلئے بھی کوشاں ہے جسکا عملی ثبوت کھیلتا پنجاب مہم کی صورت میں ہے جس سے بچوں کی جسمانی صلاحیتیں اجاگر ہوں گی اور بچوں کو قومی و بین الاقومی کھیلوں میں حصہ لینے کا موقع بھی ملے گا۔

اس موقع پر ڈسٹرکٹ سپورٹس آفیسر صائمہ منظورکا کہنا تھا کہ پنجاب میں ٹیلنٹ کی کمی نہیں ہے جن طلباکو پہلے مواقع میسر نہیں آتے تھے انہیں ایک پلیٹ فارم مہیا کردیا گیا تاکہ وہ اپنے ٹیلنٹ کے جوہر دیکھا سکیں تمام ٹورنامنٹس کو انتہائی صاف و شفاف طریقے سے کروایا جا رہا ہے ۔