آسٹریلیا اور پاکستان کی کرکٹ ٹیموں کے درمیان پہلا ٹی ٹونٹی میچ جمعرات کو کھیلا جائے گا

برسبین۔13نومبر (اے پی پی):آسٹریلیا اور پاکستان کی کرکٹ ٹیموں کے درمیان تین ٹی ٹونٹی انٹرنیشنل میچوں پر مشتمل سیریز کا پہلا میچ کل (جمعرات کو) دی گابا ،برسبین میں کھیلا جائے گا۔دونوں ٹیمیں برسبین پہنچ چکی ہیں ۔ٹی ٹونٹی سیریز میں پاکستان ٹیم کی قیادت مایہ ناز وکٹ کیپر بلے باز محمد رضوان کریں گے جبکہ میزبان آسٹریلوی ٹیم کو جوش انگلس لیڈ کریں گے۔ پاکستان کی کرکٹ ٹیم ان دنوں دورہ آسٹریلیا پر ہے جہاں وہ میزبان ٹیم کے خلاف تین ون ڈے میچوں کی سیریز کھیل چکی ہےجس میں گرین شرٹس نے کینگروز کو 1-2 سے شکست دی تھی۔پاکستان نے 22 سال بعد آسٹریلیا کو اس کے ہوم گراؤنڈ پر ون ڈے سیریز میں شکست دی۔آسٹریلیا نےپاکستان کو پہلے ون ڈے میچ میں 2 وکٹوں سے شکست دی تھی،

جس کے بعد پاکستان نے دوسرے ون ڈے میچ میں آسٹریلیا کو 9 وکٹوں سے شکست دے کر سیریز 1-1 سے برابر کر دی اور پھر تیسرے ون ڈے میچ میں 8 وکٹوں سے ہر اکر سیریز 1-2 سے اپنے نام کرلی۔ پاکستان کی ٹیم نے 22 سال کے بعد آسٹریلیا کو اس کی سرزمین پر کسی ون ڈے سیریز میں شکست دی تھی۔پاکستان کی ٹیم نے ون ڈے سیریز کے علاوہ تین ٹی ٹونٹی بین الاقوامی میچوں کی سیریز بھی کھیلنی ہے جس کے لئے پاکستان اور میزبا ن آسڑیلیا کی ٹیمیں برسبین پہنچ چکی ہیں اور ٹی ٹونٹی سیریز کی تیاریوں میں مصروف ہیں۔ تین ٹی ٹونٹی میچوں کی سیریز کا پہلا میچ 14 نومبر کو کھیلا جائے گا۔ دونوں ٹیموں کے کپتانوں نے سیریز میں کامیابی کے لئے بیانات دیئے ہیں اور ٹی ٹونٹی سیریز میں انتہائی دلچسپ اور کانٹے دار مقابلوں کی توقع کی جارہی ہے۔

دوسرا ٹی ٹونٹی میچ 16 نومبر کو سڈنی کرکٹ گرائونڈجبکہ تیسرا اور آخری ٹی ٹونٹی میچ 18 نومبر کو بیلریو اوول ہوبارٹ میں کھیلا جائے گا۔ٹی ٹونٹی سیریز کے تینوں میچز نائٹ ہوں گے اور فلڈلائٹس کی روشنی میں کھیلے جائیں گے۔