اٹک،ایئر یونیورسٹی ایرو اسپیس اینڈ ایوی ایشن کیمپس کامرہ میں“کیریئر اور فائنل ایئر پراجیکٹ ایکسپو 2026” کا انعقاد

اٹک۔ 22 مئی (اے پی پی):ایئر یونیورسٹی ایرو اسپیس اینڈ ایوی ایشن کیمپس کامرہ میں“کیریئر اور فائنل ایئر پراجیکٹ ایکسپو 2026” کا کامیاب انعقاد کیا گیا۔ اس اہم تقریب میں طلبہ، اساتذہ، صنعت سے وابستہ شخصیات، مختلف اداروں کے نمائندگان اور معزز مہمانوں نے بھرپور شرکت کی۔ایکسپو کے مہمانِ خصوصی ائیر مارشل کاشف قمر، ہلالِ امتیاز (ملٹری)، ڈپٹی پریزیڈنٹ نیشنل ایرو اسپیس سائنس اینڈ ٹیکنالوجی پارک (ناسٹپ) تھے۔

ائیر وائس مارشل شمس الحق، ہلالِ امتیاز (ملٹری) ریٹائرڈ نے معزز مہمانوں کا پرتپاک استقبال کیا۔ایکسپو میں مختلف شعبہ جات کے طلبہ کی جانب سے تیار کردہ جدید، تحقیقی اور تخلیقی فائنل ایئر پراجیکٹس پیش کیے گئے۔ ان منصوبوں میں ایوی ایشن مینجمنٹ، برقی انجینئرنگ، مکینیکل انجینئرنگ، کمپیوٹر سائنس اور سائبر سیکیورٹی سے متعلق جدید تصورات اور عملی حل نمایاں تھے۔ طلبہ نے اپنی فنی مہارت، تحقیقی صلاحیت اور اختراعی سوچ کا شاندار مظاہرہ کیا تقریب کے دوران مختلف قومی اور نجی اداروں کے نمائندگان نے طلبہ سے ملاقات کی اور انہیں مستقبل کے پیشہ ورانہ مواقع، تربیتی پروگرامز اور عملی میدان میں درکار مہارتوں کے حوالے سے رہنمائی فراہم کی۔ شرکاء نے طلبہ کے منصوبوں اور ان کی پیشکش کو انتہائی سراہا اور اسے نوجوان نسل کی صلاحیتوں کا بہترین اظہار قرار دیا۔ معزز مہمانوں اور فیکلٹی اراکین نے نمائش کا تفصیلی جائزہ لیا اور طلبہ و اساتذہ کی محنت اور لگن کو خراجِ تحسین پیش کیا