لندن ۔9اکتوبر (اے پی پی):سابق برطانوی وزیر اعظم بورس جانسن نے کہا ہے کہ انہوں نے اپنے ڈاؤننگ سٹریٹ اپارٹمنٹ کی تزئین و آرائش کی کیونکہ یہ منشیات کے اڈےکی طرح لگتا تھا۔العربیہ کے مطابق یہ بات قابل ذکر ہے کہ جانسن نے ڈاؤننگ سٹریٹ میں اپارٹمنٹ نمبر 11 کی تزئین و آرائش کی نگرانی کی جس پر 50 ہزار پاؤنڈ سٹرلنگ سے زیادہ خرچ ہوئے۔ انہوں نے بار بار تصدیق کی کہ انہوں نے اخراجات اپنے اکاؤنٹ سے ادا کیے ۔یہ قابل ذکر ہے کہ بورس جانسن سابق وزیراعظم تھریسا مے کے بعد 11 ڈاؤننگ سٹریٹ چلے گئے تھے۔ جانسن کی اہلیہ کیری کے فرنیچر پر اعتراض کے بعد اپارٹمنٹ کی تزئین و آرائش کے لیے ایک مشہور انٹیریئر ڈیزائنر کی خدمات حاصل کی گئیں۔اس وقت افواہیں گردش کر رہی تھیں کہ تزئین و آرائش کے عمل میں استعمال ہونے والا وال پیپر سونے کا تھا لیکن جانسن نے ان الزامات کی تردید کی۔
بنک اکاؤنٹس سے پتا چلا کہ تزئین و آرائش کی لاگت 52,000 پاؤنڈ تھی جو ابتدائی طور پر کیبنٹ آفس کے ذریعے ادا کی گئی جس نے کنزرویٹو پارٹی کو ایک رسید جاری کی جسے بعد میں واپس کر دیا گیا۔اپریل 2021ء میں بورس جانسن نے پارلیمنٹ کو بتایا کہ میں نے اخراجات برداشت کیے ہیں اور یقیناً ایک کمیٹی ہے جو اس کی تحقیقات کر رہی ہے، میں یقین دلاتا ہوں کہ میں نے وزارتی طرز عمل اور اخلاقیات کے اصولوں کی مکمل تعمیل کی ہے۔برطانوی الیکشن کمیشن نے وزیر اعظم پر نجی عطیات کو استعمال کرنے کا الزام عائد کیے جانے کے بعد جانسن کے اپارٹمنٹ کی تزئین و آرائش کی تحقیقات شروع کرنے کا اعلان کیا تھا۔کئی مہینوں کے تنازعے کے بعد ایک حکومتی وزیر نے پارلیمنٹ میں ایک تحریری جواب میں کہا کہ جانسن نے اپنی جیب سے اخراجات برداشت کیے ہیں۔
