این آر ایل گرینڈ فائنل،اینڈریو جونز اپنی ٹیم کے فائنل میں پہنچنے پر جذباتی، کمنٹری سے دستبرداری کی پیشکش ٹھکرا دی

سڈنی۔4اکتوبر (اے پی پی):نیشنل رگبی لیگ (این آر ایل)کے فائنل کے موقع پر نیوکیسل کے لیجنڈ سابق کھلاڑی اینڈریو جونز نے کلب کے 25 سال بعد گرینڈ فائنل میں پہنچنے پر جذباتی کیفیت کا اظہار کرتے ہوئے کہا ہے کہ وہ میچ کے نتیجے پر کوئی اختیار نہ ہونے کے باعث شدید بے چینی محسوس کر رہے ہیں۔ سڈنی مارننگ ہیرالڈ کے مطابق اینڈریو جونز کو ٹیلی وژن انتظامیہ کی جانب سے اتوار کی رات کمنٹری کی ذمہ داری سے دستبردار ہونے اور میچ بطور شائق دیکھنے کی پیشکش کی گئی تھی، تاہم انہوں نے انکار کردیا۔ ان کا کہنا تھا کہ کمنٹری کرنا ان کا کام ہے اور وہ اپنی ذمہ داری پوری کرنا چاہتے ہیں، لیکن وہ اتنے ہی نروس ہیں جتنے اپنے کھیل کے آغاز کے وقت تھے۔

اینڈریو جونز نے کہا کہ کیمرون سمتھ ان کے قریب ہوں گے اور اگر وہ جذباتی ہوگئے تو کیمرون سمتھ ان کا ساتھ دیں گے۔ اینڈریو جونز نے نیوکیسل کو 1997 اور 2001 میں دونوں چیمپئن شپ جتوانے میں اہم کردار ادا کیا تھا۔ میچ کے لیے یکجہتی اور جوش و خروش کا ایک دلچسپ واقعہ اس وقت سامنے آیا جب اینڈریو جونز کے اپنے ہی بیٹے لوئس نے دوستوں کے ساتھ مل کر اپنے والد کی گاڑی کا راستہ روکا اور ان سے دوستانہ نوک جھونک کی۔ لوئس خود سڈنی روسٹرز کا حصہ ہیں لیکن وہ نیو کیسل نائٹس کی حمایت کر رہے ہیں۔

روسٹرز کے مداحوں نے اینڈریو جونز کے گھر کے باہر ایک مزاحیہ بینر بھی آویزاں کر رکھا تھا جس پر انہیں نیو کیسل واپس جانے کا مشورہ دیا گیا تھا۔ اینڈریو جونز نے اس تمام واقعے کو خوشگوار قرار دیا اور میچ پر توجہ مرکوز رکھنے کے عزم کا اظہار کیا۔ادھر آسٹریلوی ٹیم کے کھلاڑی ڈیوڈ ففیٹا کا پاپوا نیو گنی کے دورے کے دوران موبائل فون ایک شخص نے چوری کرلیا۔ ٹیم انتظامیہ نے جی پی ایس کے ذریعے فون تلاش کرنے کی کوشش کی جبکہ مقامی پولیس بھی مدد کے لیے پہنچ گئی۔ فون ملنے کے بعد ففیٹا کو اطمینان ہوا کہ ان کی تصاویر اور وڈیوز محفوظ ہیں۔