ایچ ایم ایس چوہدری امیچور گالف کپ، حسین حمید نمایاں،ونگ کمانڈر عبدالنافع سینئرز میں آگے

لاہور۔21نومبر (اے پی پی):ڈیفنس رایا گالف اینڈ کنٹری کلب میں 11ویں وائس ایڈمرل ایچ ایم ایس چوہدری امیچور گالف کپ کا آغاز جمعہ کو شاندار انداز میں ہوا۔پہلے روز امیچور اور سینئر امیچور کیٹگریز میں کھلاڑیوں نے عمدہ کارکردگی کا مظاہرہ کیا۔امیچور ڈویژن میں حسین حمید (آر پی) نے دن کی سب سے متاثرکن کارکردگی پیش کی۔ انہوں نے شاندار گراس 69 اور نیٹ 67 سکور کرتے ہوئے پہلے ہی رائونڈ میں لیڈر بورڈ پر مضبوط برتری حاصل کرلی۔

فرنٹ نائن پر 36 اور بیک نائن پر شاندار 33 سکور ان کی مستقل مزاجی اور بھرپور اعتماد کی علامت رہے۔ان کے قریب ترین حریفوں میں حسن ارشد (رایا) اور محسن ظفر (جی وائے ایم) شامل رہے، جنہوں نے نیٹ 68 سکور کیا۔ دونوں نے مختلف کھیل انداز دکھائے ،محسن ظفر نے زیادہ درستگی کے ساتھ گراس 72 کھیلتے ہوئے بہتر کارکردگی دکھائی جبکہ حسن ارشد نے اپنے ہینڈی کیپ کا موثر استعمال کرتے ہوئے گراس 76 کے باوجود خود کو مضبوط پوزیشن میں برقرار رکھا۔اس کے علاوہ عامر خاور خواجہ، شاہد انور، محمد عابد

انعام ملک اور میاں راشد رشید نے نیٹ 69 سکور کر کے مقابلے کو مزید سخت کردیا۔ فرید مانیکا، غلام قادر، سمیر افتخار اور ریحان آصف نے نیٹ 70 تا 72 سکور کے ساتھ لیڈر بورڈ پر مضبوط موجودگی برقرار رکھی۔سینئر امیچور کیٹگری میں ونگ کمانڈر عبدالنافع (جی وائے ایم) نے پہلے روز گراس 81 اور نیٹ 70 کے ساتھ معمولی مگر اہم سبقت حاصل کی۔ ان کے تعاقب میں نیٹ 71 پر احمد ظفر حیات، عبدالرئوف علی،عمیر بٹ اور کرنل زعیم الرحمان شامل تھے،جنہوں نے چیلنجنگ ڈیفنس رایا کورس پر پرسکون اور حکمت عملی سے بھرپور کھیل پیش کیا۔سینئر کیٹگری میں مزید تجربہ کار کھلاڑی حیدر ملہی

میجر جنرل اظہر نوید اور ایئر کموڈور طارق عثمان نے نیٹ 72،73 سکور کر کے لیڈر بورڈ پر دبائو برقرار رکھا۔ کئی کھلاڑیوں نے نیٹ 74 تا 78 کی رینج میں اچھا کھیل پیش کیا تاہم کچھ کھلاڑی مشکل بیک نائن کے باعث سکور کو 80 میں لے گئے۔