اسلام آباد۔16اکتوبر (اے پی پی):ہائر ایجوکیشن کمیشن (ایچ ای سی) نے عوام کو متنبہ کیا ہے کہ کمیشن سے منسوب جعلی کالز اور سوشل میڈیا پیجز کے ذریعے دھوکہ دہی کے واقعات میں اضافہ ہو رہا ہے۔ایک عوامی انتباہ میں ایچ ای سی نے بتایا کہ کچھ جعلساز ایچ ای سی سے منسلک ہونے کا دعویٰ کر کے عوام کو کالز کر رہے ہیں اور ڈگری تصدیق یا پہلے سے تصدیق شدہ دستاویزات کی دوبارہ تصدیق کے بہانے ذاتی معلومات حاصل کر رہے ہیں۔
کچھ افراد جو خود کو ایچ ای سی کے تصدیقی ایجنٹ ظاہر کرتے ہیں، ڈگری تصدیق کی خدمات کے نام پر حد سے زیادہ فیس کا مطالبہ کر رہے ہیں جو مقررہ چارجز سے بہت زیادہ ہے۔جعلی سوشل میڈیا صفحات بھی عوام کو غیر مجاز ڈگری تصدیقی خدمات کے فروغ کے ذریعے دھوکہ دینے کے لیے استعمال ہو رہے ہیں۔ایچ ای سی نے واضح کیا ہے کہ وہ تصدیقی مقاصد کے لیے کسی ایجنٹ یا نمائندے کو تعینات نہیں کرتا اور نہ ہی ان خدمات کے بارے میں کسی فرد سے غیر ضروری رابطہ کرتا ہے۔
عوام سے درخواست کی گئی ہے کہ وہ کسی بھی ڈگری سے متعلق تصدیق کے لیے صرف ایچ ای سی کی سرکاری ویب سائٹ (www.hec.gov.pk) یا ایچ ای سی تصدیقی پورٹل (eservices.hec.gov.pk) استعمال کریں۔عوام الناس سے گزارش کی گئی ہے کہ وہ ایسی کسی کال یا دعوت کا جواب نہ دیں اور کسی بھی شخص یا سوشل میڈیا صفحے پر اعتماد نہ کریں جو ایچ ای سی تصدیق خدمات کا دعویٰ کرے۔
دھوکہ دہی پر مبنی کالز کو بلاک کرنے کے لیے اپنے ٹیلی کام فراہم کنندہ کی ہیلپ لائن پر اطلاع دیں یا شکایت پاکستان ٹیلی کمیونیکیشن اتھارٹی (پی ٹی اے) کی ویب سائٹ www.pta.gov.pk یا ٹول فری نمبر 0800-55055 پر درج کروائیں۔مالی فراڈ کی صورت میں افراد کو اسٹیٹ بینک آف پاکستان کے ای میل [email protected] پر رابطہ کرنے کی ہدایت کی گئی ہے۔
