نیویارک۔27جون (اے پی پی):کوپا امریکا فٹ بال چیمپئن شپ 2024 میں ایکواڈور اور وینزویلا نے گروپ بی کے اپنے میچز جیت لئے ۔ ایکواڈور کی ٹیم نے گروپ بی کے میچ میں جمیکا کو شکست دے دی جبکہ اسی گروپ کے ایک اور میچ میں وینزویلا نے میکسیکو کی ٹیم کو ہرا دیا۔
سائوتھ امریکا فٹ بال کنفیڈریشن کے زیر اہتمام کوپا امریکا کے 48 ویں ایڈیشن کے سنسنی خیز مقابلے امریکا میں جاری ہیں،جس میں شائقین فٹ بال کو انتہائی دلچسپ مقابلے دیکھنے کو مل رہے ہیں۔ ایلجیئنٹ اسٹیڈیم، لاس ویگاس، نیواڈا میں کھیلے گئے گروپ بی کے پہلے میچ میں ایکواڈور نے دلچسپ مقابلے کے بعد جمیکا کی ٹیم کو 1 کے مقابلے میں 3 گول سے ہرا دیا۔
کیسی ریمیل پامر،رے کینڈری پیز اینڈریڈ اور ایلن اسٹیو منڈا گارسیانے ایک ایک گول کر کے ایکواڈور کی فتح میں اہم کردار ادا کیا۔جمیکا کی طرف سے واحد گول مائیکل گریگوری انتونیو نے سکور کیا۔سوفی اسٹیڈیم، انگل ووڈ، کیلیفورنیا میں کھیلے گئے گروپ بی کے ہی دوسرے میچ میں وینزویلا اور میکسیکو کی ٹیمیں آمنے سامنے تھیں جس میں وینزیلاکی ٹیم نے میکسیکو کو سخت مقابلے کے بعد 0-1 گول سے ہرا دیا۔ جوز سالومن رونڈن گیمنیز نے میچ کے 57 ویں منٹ پر پنلٹی کک پر گول کر کے اپنی ٹیم کو فتح دلا دی۔
