ایگزیکٹو ڈائریکٹر پی آر سی سی ایس ایف کا یو اے ای سفارتخانہ کا دورہ، سفیر سے ملاقات

اسلام آباد۔6اپریل (اے پی پی):پاکستان ریسرچ سینٹر فار اے کمیونٹی ود شیئرڈ فیوچر (پی آر سی سی ایس ایف ) کے ایگزیکٹو ڈائریکٹر خالد تیمور اکرم نے اسلام آباد میں متحدہ عرب امارات کے سفارتخانہ کا دورہ کیا جہاں انہوں نے یو اے ای کے سفیر سالم محمد سالم البواب الزابی سے ملاقات کی۔ پیر کو جاری ایک پریس ریلیز کے مطابق ملاقات کے دوران سفیر سالم محمد سالم البواب الزابی نے متحدہ عرب امارات اور پاکستان کے درمیان ثقافتی، تعلیمی اور سفارتی تعاون کے فروغ کے لئے خالد تیمور اکرم کی گراں قدر خدمات اور مسلسل کوششوں کو سراہا۔ انہوں نے تحقیق اور ادارہ جاتی روابط کے ذریعے عوامی سطح پر تعلقات کو مضبوط بنانے اور مکالمے کو فروغ دینے میں ان کے کردار کا اعتراف کیا۔

خالد تیمور اکرم نے بھی دونوں برادر ممالک کے مابین دوطرفہ تعلقات کو مزید مستحکم کرنے کے لئے سفیر سالم محمد الزابی کے متحرک کردار اور تعلیم، تحقیق و ثقافتی تبادلوں سمیت مختلف شعبوں میں سفارتخانہ کے اقدامات کی تعریف کی۔گفتگو میں دونوں ممالک کے تھنک ٹینکس، تعلیمی اداروں اور پالیسی ریسرچ کے اداروں کے درمیان تعاون بڑھانے کی ضرورت پر زور دیا گیا اور اس بات پر اتفاق کیا گیا کہ اس طرح کے اشتراک سے باہمی افہام و تفہیم کو گہرا کرنے اور شراکت داری کے نئے مواقع تلاش کرنے میں مدد ملے گی۔

فریقین نے تحقیق اور علم کے تبادلے کے شعبوں میں مل کر کام کرنے پر اتفاق کیا جس کے تحت فکری تعاون اور ادارہ جاتی روابط کو مضبوط بنانے کے لئے مشترکہ سیمینارز، کانفرنسیں اور ڈائیلاگ پلیٹ فارمز منعقد کئے جائیں گے۔ ملاقات میں پاک یو اے ای تعلقات کو مزید آگے بڑھانے اور باہمی دلچسپی کے شعبوں میں طویل المدتی تعاون کے عزم کا اظہار کیا گیا ۔