بارسلونا کی ٹیم سپینش لیگ لالیگاپوائنٹس ٹیبل پربدستور پہلے نمبر پر براجمان

میڈرڈ۔14نومبر (اے پی پی):سپینش فٹ بال لیگ لالیگا پوائنٹس ٹیبل پربارسلونا کی ٹیم پہلے ، ریال میڈرڈ دوسرے اور ایٹلیٹیکو میڈرڈتیسرے نمبر موجود ہے۔ سپینش لیگ لالیگا کے 94 ویں سیزن کے انتہائی دلچسپ اور کانٹے دار مقابلوں کا سلسلہ سپین میں جاری ہے۔ اس ایونٹ کو لالیگا ای اے سپورٹس کے نام سے بھی جانا جاتا ہے ۔ سپینش فٹ بال لیگ لالیگاکا 94 ویں سیزن کا آغازرواں سال 15 اگست 2024 کو ہوا اور 25 مئی 2025 کو اختتام پذیر ہوگا۔ ریال میڈرڈ دفاعی چیمپئن ہے، جس نے گزشتہ سیزن میں اپنا 36 واں ٹائٹل جیتا تھا۔

اب تک کھیلے گئے لیگ میچز میں 15 ٹیمیں 13،13 میچز کھیل چکی ہیں۔بارسلونا کی ٹیم 11 میچز جیت کر پوائنٹس ٹیبل پر ٹاپ پوزیشن پر براجمان ہے۔ دفاعی چیمپئن ریال میڈرڈ 12 میچز کھیل چکی ہے جن میں اس نے 8 میچز جیتے ہیں اور وہ 27 پوائنٹس کے ساتھ ٹیبل پر دوسرے نمبر پر ہے۔ ایٹلیٹیکو میڈرڈکی تیم پوائنٹس ٹیبل پر تیسرے نمبر پر ہے ،ایٹلیٹیکو میڈرڈ کی ٹیم 13 میچز میں سے 7 میچز جیت سکی ہے اور اس کے 26 پوائنٹس ہیں۔ ویلریال کی ٹیم کے 24 پوائنٹس ہیں اور وہ چوتھے نمبر پر ہے،اوساسونا کی ٹیم 21 پوائنٹس کے ساتھ ٹیبل پر پانچویں نمبر پر ہے۔ ایتھلیٹک بلباؤ اورریال بیٹس کی ٹیمیں 20،20 مساوی پوائنٹس کے ساتھ بالترتیب چھٹے اور ساتویں نمبر پر ہیں۔ اسی طرح ریال سوسی ڈیڈ ،میلورکا اور گیرونا کی ٹیمیں 18،18 مساوی پوائنٹس کے ساتھ ٹیبل پر بالترتیب آٹھویں ،نویں اور دسویں نمبر پر ہیں