بھارتی ٹیم پہلے ٹیسٹ میچ میں پہلی اننگز میں 150رنز بناکر آئوٹ ،آسٹریلیا نے پہلے روز کھیل ختم ہونے تک 7 وکٹ پر 67رنز بنا لئے

پرتھ۔22نومبر (اے پی پی):آسٹریلوی بائولرز کی عمدہ بائولنگ کے باعث بھارتی ٹیم پانچ میچوں کی سیریز کے ابتدائی ٹیسٹ میچ کے پہلے روز اپنی پہلی اننگز میں 150رنز بناکر آئوٹ ہوگئی، جواب میں میزبان ٹیم بھی مشکلات کا شکار، پہلے روز کھیل ختم ہونے تک 7 وکٹوں کے نقصان پر 67 رنز بنالئے اور اسے بھارتی اننگز کا سکور برابر کرنے کےلیے مزید 83رنز درکار تھے ۔میچ کے پہلے روز 17 وکٹیں گر گئیں۔کینگروز بائولرز کے سامنے مہمان بھارتی ٹیم بالکل بے بس نظر آئی۔ اس کے 7 کھلاڑی ڈبل ڈیجٹ بھی عبور نہ کر پائے۔اپنے کیریئر کا پہلا ٹیسٹ میچ کھیلنے والے نتیش کمار ریڈی 41،ریسبھ پنت 37 اور لوکیش راہول 26رنز کے ساتھ نمایاں بلے باز رہے۔ آسٹریلیا کی طرف سے عمدہ بائولنگ کا مظاہرہ کرتے ہوئے جوش ہیزل ووڈ نے 4،مچل سٹارک،پیٹ کمنز اور مچل مارش نے دو، دو کھلاڑیوں کو آئوٹ کیا۔آسٹریلوی ٹیم بھی مشکلات میں ہے اور اس نے میچ کے پہلے روز کھیل ختم ہونے تک 67 رنز پر اپنی 7 وکٹیں گنوا دیں۔

بھارت کی جانب سے جسپریت بمرانے 4 محمد سراج نے 2 اورہرشیت رانا نے ایک کھلاڑی کو آئوٹ کیا۔آسٹریلیا کے ایلکس کیری 19 اور مچل سٹارک 6 رنز کے ساتھ ناٹ آئوٹ ہیں۔ جمعہ کو پرتھ سٹیڈیم، پرتھ کے مقام پر دونوں ٹیموں کے درمیان پانچ میچوں کی بارڈر ،گواسکر ٹرافی سیریز کے ابتدائی ٹیسٹ میچ شروع ہوا تو مہمان بھارتی ٹیم کے کپتان جسپریت بمرا نے ٹاس جیت کر پہلے بیٹنگ کا فیصلہ کیا، تو یشسوی جیسوال اور لوکیش راہول نے مایوس کن انداز میں اننگز کا آغاز کیا۔ بھارت کی آدھی ٹیم 59 کے مجموعی سکور پر پویلین لوٹ گئی ۔آسٹریلوی بائولرز نے کسی بھی کھلاڑی کو وکٹ پر جم کر نہ کھیلنے دیا۔ یشسوی جیسوال صفر،دیودت پڈیکل صفر،ویرات کوہلی 5،لوکیش راہول 26 اور دھرو جریل 11 رنز بناکر آئوٹ ہوگئے۔ واشنگٹن سندر 4،ریشبھ پنت 37 ،ہرشیت رانا 7،کپتان جسپریت بمرا 8 رنز بناکر آئوٹ ہوگئے۔نتیش کمار ریڈی بھارت کے آخری آئوٹ ہونے والے کھلاڑی تھے جو 41 رنز بناکر آئوٹ ہوئے۔محمد سراج بغیر کوئی رن بنائے ناٹ آئوٹ رہے۔ آسٹریلیا کی طرف سے عمدہ بائولنگ کا مظاہرہ کرتے ہوئے جوش ہیزل ووڈ نے 4،مچل سٹارک،پیٹ کمنز اور مچل مارش نے دو، دو کھلاڑیوں کو آئوٹ کیا۔

جواب میں آسٹریلیا کی جانب سے اننگز کا آغاز عثمان خواجہ اور نیتھن میک سوینی نے کیا، جو کچھ خاص نہ تھا آسٹریلیا کے 6 کھلاڑی 47 کے مجموعی سکور پر آئوٹ ہوگئے۔ نیتھن میک سوینی 10،عثمان خواجہ 8، سٹیون سمتھ صفر،ٹراوس ہیڈ 11،مچل مارش 6 ، مارنس لبوشین 2،کپتان پیٹ کمنز 3رنز بناکر پویلین لوٹ گئے۔میچ کے پہلے روز جب کھیل ختم ہوا تو آسٹریلوی ٹیم نے بھارتی اننگز کے سکور 150رنز کے جواب میں 7 وکٹوں کے نقصان پر 67رنز بنالیے تھے اور اس کو بھارتی اننگز کا سکور برابر کرنے کے لئے 83 رنز کی ضرورت تھی ۔ایلکس کیری 19 اور مچل سٹارک 6رنز کے ساتھ ناٹ آئوٹ تھے۔ بھارت کی جانب سے جسپریت بمرانے 4، محمد سراج نے 2 جبکہ ہرشیت رانا نے ایک کھلاڑی کو آئوٹ کیا۔