اسلام آباد۔26اکتوبر (اے پی پی):کل جماعتی حریت کانفرنس آزاد جموں و کشمیر چیپٹر کے رہنما زاہد صافی نے 27 اکتوبر کو "انسانیت کے قتل”کا دن قرار دیتے ہوئے اس کی شدید مذمت کی اور اس بات پر زور دیا ہے کہ بھارت اپنے وحشیانہ فوجی تسلط کے باوجود کشمیر کی آواز کو خاموش کرنے میں ناکام ہے۔ پی ٹی وی نیوز چینل کے ساتھ اپنے خصوصی ویڈیو پیغام میں انہوں نے واضح کیا کہ یہ 27 اکتوبر 1947 کا دن تھا جب ہندوستانی فوجیوں نے برصغیر کی تقسیم کے منصوبے کی روح کی خلاف ورزی کرتے ہوئے جموں و کشمیر کے عوام پر فوجی حملہ کیا تھا اور اس پر غیر قانونی تسلط کیا تھا۔
انہوں نے زور دے کر کہا کہ بھارت کے جارحانہ اقدامات کشمیری عوام کی حق خودارادیت کی غیر متزلزل جدوجہد کو روک نہیں سکیں گے، کشمیر پر بھارت کا غاصبانہ تسلط جلد ختم ہونے والا ہے اور کشمیریوں کی قربانیاں بالآخر رنگ لائیں گی۔ انہوں نے کہا کہ غیر قانونی بھارتی فوجیوں کی تعیناتی کے باوجود بھارت کشمیریوں کے جذبہ آزادی کو کمزور کرنے میں ناکام رہا ہے اور کشمیری عوام اپنی تحریک آزادی کو منطقی انجام تک پہنچانے تک جدوجہد جاری رکھیں گے۔ زاہد صافی نے اس امید کا اظہار کیا کہ عالمی بیداری میں اضافہ، پاکستان کی غیر متزلزل حمایت تنازعہ کشمیر کے پرامن حل کی راہ ہموار کرے گی، بالآخر کشمیری عوام کی دیرینہ امنگوں کا احترام کیا جائے گا۔
