تھائی لینڈ اور کمبوڈیا کے درمیان جنگ بندی کا معاہدہ، اقوامِ متحدہ کا خیر مقدم

اقوام متحدہ ۔29جولائی (اے پی پی):اقوامِ متحدہ کے سیکریٹری جنرل انتونیو گوتریش نے تھائی لینڈ اور کمبوڈیا کے درمیان جنگ بندی کے معاہدے کا خیر مقدم کرتے ہوئے اسے کشیدگی کم کرنے اور دیرپا امن کی جانب "مثبت پیش رفت” قرار دیا ہے۔اقوامِ متحدہ کے ترجمان فرحان حق کے مطابق، سیکرٹری جنرل نے دونوں ممالک پر زور دیا ہے کہ وہ اس معاہدے کی مکمل پاسداری کریں اور ایسے حالات پیدا کریں جن سے دیرینہ مسائل کا پُرامن حل ممکن ہو سکے۔

ترجمان کے جاری کردہ بیان میں کہا گیا کہ اقوام متحدہ ملائیشیا، جو اس وقت آسیان تنظیم کی صدارت کر رہا ہے، کے ساتھ ساتھ امریکا اور چین کی ان تھک کوششوں کو بھی سراہتے ہیں جن کی بدولت اس پُرامن معاہدے کا امکان پیدا ہوا۔بیان میں مزید کہا گیا کہ اقوامِ متحدہ خطے میں امن و استحکام کے فروغ کے لیے ہر ممکن معاونت فراہم کرنے کو تیار ہے۔

واضح رہے کہ ملائیشیا کے وزیرِاعظم انور ابراہیم کی میزبانی میں پُتراجایہ میں ہونے والے اہم اجلاس کے بعد اعلان کیا گیا کہ تھائی لینڈ اور کمبوڈیا کے رہنماؤں نے پیر کی شب بارہ بجے سے جنگ بندی پر عمل درآمد کا فیصلہ کیا ہے۔تجزیہ کاروں کا کہنا ہے کہ یہ معاہدہ جنوب مشرقی ایشیا میں ایک اہم سفارتی کامیابی اور خطے میں کشیدگی میں کمی کی جانب ایک بڑا قدم ہے۔