بیجنگ ۔30ستمبر (اے پی پی):امریکا کی نامور ٹینس سٹار اور ایونٹ کی سیکنڈ سیڈڈ جیسکا پیگولا،امریکا کی ہی ٹینس سٹار کوکوگف اور چین کی ٹینس سٹار شوائی ژینگ چین کے دارالحکومت بیجنگ میں جاری چائنا اوپن ٹینس ٹورنامنٹ میں خواتین کے سنگلز مقابلوں کے پری کوارٹر فائنل رائونڈ میں پہنچ گئیں ۔
جیسکا پیگولانے ویمنز سنگلز کے تیسرے رائونڈ میں روسی کی ویرونیکا ایڈورڈونا کدرمیٹوواکو،امریکا کی ہی ٹینس سٹار کوکوگف نے تیسرے رائونڈ میں 28 سالہ برطانوی کھلاڑی کیٹی بولٹر کو اور چین کی ٹینس سٹار شوائی ژینگ نے تیسرے رائونڈ میں بیلجیئم کی حریف کھلاڑی گریٹ مینن کو شکست دی۔ چین کے دارالحکومت بیجنگ میں جاری چائنا اوپن ٹینس ٹورنامنٹ میں خواتین کے سنگلز مقابلوں کے تیسرے رائونڈ میں امریکی ٹینس کھلاڑی جیسکا پیگولانے روسی کی ویرونیکا ایڈورڈونا کدرمیٹوواکو7-6(11-9)،1-6، اور 2-6 سے شکست دے کر پری کوارٹر فائنل کے لئے کوالیفائی کیا، جہاں ان کا مقابلہ ہسپانوی حریف کھلاڑی پاؤلا بدوسا گیبرٹ سے ہوگا۔ امریکا کی ہی ٹینس سٹار کوکوگف نے تیسرے رائونڈ کی رکاوٹ عبور کرلی۔ انہوں نے عمدہ کھیل پیش کرتے ہوئے 28 سالہ برطانوی کھلاڑی کیٹی بولٹر کو سٹریٹ سیٹس میں 5-7 اور 2-6 سے شکست دے کر ٹاپ 16 رائونڈ کے لئے کوالیفائی کرلیا۔
ایک اور میچ میں چین کی ٹینس سٹار شوائی ژینگ نے تیسرے رائونڈ میں بیلجیئم کی حریف کھلاڑی گریٹ مینن کو سٹریٹ سیٹس میں 2-6 اور 3-6 سے ہرا کر ٹاپ 16 رائونڈ کے لئے کوالیفائی کرلیا۔
