خیبر پختونخوا میں مویشیوں کی لمپی سکن اور دیگر بیماریوں کے خلاف ویکسی نیشن مہم

پشاور۔ 04 اکتوبر (اے پی پی):محکمہ لائیو اسٹاک اینڈ ڈیری ڈویلپمنٹ خیبر پختونخوا کی جانب سے مویشیوں کو لمپی سکن بیماری سے محفوظ رکھنے کےلیے صوبہ بھر میں خصوصی ویکسی نیشن مہم بھرپور انداز میں جاری ہے۔

محکمہ کی جانب سے جاری بیان کے مطابق ویٹرنری ٹیمیں فیلڈ میں متحرک رہتے ہوئے دور دراز علاقوں تک پہنچ رہی ہیں اور مویشی پال کسانوں کو ان کی دہلیز پر ضروری ویٹرنری سہولیات فراہم کر رہی ہیں۔ مہم میں جانوروں کا بروقت علاج اور ضروری طبی سہولیات دینا، ڈی ورمنگ کی سرگرمیاں، مویشی پال کسانوں میں بیماری سے بچاؤ اور احتیاطی تدابیر سے متعلق آگاہی دینا شامل ہیں۔

ڈیجیٹل مانیٹرنگ کے ذریعے ویکسین کے استعمال، ادویات، فیلڈ سرگرمیوں اور ویکسی نیشن کوریج کا ڈیجیٹل ریکارڈ مرتب کیا جا رہا ہے اور مسلسل نگرانی کی جا رہی ہے تاکہ شفافیت، بروقت رپورٹنگ اور مؤثر مانیٹرنگ کو یقینی بنایا جا سکے۔