راولپنڈی ۔19اگست (اے پی پی):بنگلہ دیش کرکٹ ٹیم کے ہیڈ کوچ چندیکا ہتھورا سنگھے نے کہا ہے کہ راولپنڈی کی پچ فاسٹ بائولنگ اور بیٹنگ کیلئے سازگار ہے، فاسٹ باؤلرز اچھی فارم میں ہیں، امید ہے بیٹرز بھی پنڈی کی پچ پر اچھا پرفارم کریں گے، پی سی بی نے لاہور میں ہمارے لئے بہترین ٹریننگ کا انعقاد کیا جہاں ہماری ٹیم نے بہت اچھے ماحول میں پریکٹس کی ۔ان خیالات کا اظہار انہوں نے راولپنڈی سٹیڈیم میں میڈیا سے گفتگو کرتے ہوئے کیا ۔انہوں نے کہا کہ شکیب الحسن پہلے سے زیادہ فٹ ہیں اور اچھا پرفارم کر رہے ہیں ۔
انہوں نے کہا کہ راولپنڈی کی پچ فاسٹ باؤلرز اور بیٹنگ کے لئے سازگار لگ رہی ہے، ہماری ٹیم میں فاسٹ باؤلر زیادہ ہیں اور دو سپنر ہیں جو کہ آل راؤنڈر ہیں۔انہوں نے کہا کہ ہوم گراؤنڈ پر 250 کا سکور وننگ سکور ہوتا ہے ، امید ہے ہمارے بیٹرز پنڈی کی پچ پر اچھا پرفارم کریں گے ۔انہوں نے کہا کہ ہمارے فاسٹ باؤلرز ینگ ہیں اور بہت اچھا پرفارم کر رہے ہیں ،خاص طور پر انہوں نے حالیہ ورلڈ کپ میں بہترین کارکردگی کا مظاہرہ کیا ۔
انہوں نے پاکستان کرکٹ بورڈ کا شکریہ ادا کرتے ہوئے کہا کہ ہمارے لیے لاہور میں ٹریننگ کا انعقاد کیا گیا جہاں تین دن کھلاڑیوں نے بہت اچھے ماحول میں بھرپور پریکٹس کی ، اس کے ساتھ ساتھ ہماری اے ٹیم کو یہاں کھیلنے کا موقع دیا گیا ۔ہیڈ کوچ نے مزید کہا کہ وہ مشتاق احمد کو 1998 ء سے جانتے ہیں، ان کی کوچنگ سے سپن باؤلنگ کے شعبے میں بہت بہتری آئی ہے ، وہ فیصلہ سازی میں بھی رہنمائی کرتے ہیں ۔ہتھورا سنگھے نے کہا کہ وہ اپنی ذمہ داریاں کنٹریکٹ کی مدت مکمل ہونے تک جاری رکھیں گے ،اگر بنگلہ دیش کرکٹ بورڈ نے مجھے تبدیل کرنا ہو تو فیصلہ منظور ہو گا۔
