ستائیس اکتوبر کو یومِ سیاہ انتہائی عزم اور سنجیدگی کے ساتھ منایا جائے گا، مشتاق احمد بٹ

اسلام آباد۔18اکتوبر (اے پی پی):کل جماعتی حریت کانفرنس (اے پی ایچ سی) آزاد جموں و کشمیر چیپٹر کے سیکرٹری اطلاعات مشتاق احمد بٹ نے کہا ہے کہ آزاد جموں و کشمیر میں 27 اکتوبر کو یومِ سیاہ انتہائی عزم اور سنجیدگی کے ساتھ منایا جائے گا۔یہاں جاری بیان میں انہوں نے کہا کہ 27 اکتوبر 1947 جموں و کشمیر کی تاریخ کا سیاہ ترین دن ہے، جب بھارت نے کشمیری عوام کی مرضی اور بین الاقوامی قوانین کی کھلی خلاف ورزی کرتے ہوئے اپنی فوجیں وادی میں اتاریں۔

اسی دن سے کشمیری عوام بھارتی تسلط، ظلم و جبر اور انسانی حقوق کی سنگین پامالیوں کا سامنا کر رہے ہیں۔مشتاق احمد بٹ نے بتایا کہ اس موقع پر جموں و کشمیر لبریشن سیل (اے جے کے حکومت کے تحت) کے تعاون سے پورے خطے میں ریلیاں، سیمینارز، احتجاجی مظاہرے اور آگاہی پروگرامز منعقد کیے جائیں گے۔ ان سرگرمیوں کا مقصد بھارتی قابض افواج کے مظالم کو بے نقاب کرنا اور عالمی برادری کو اقوامِ متحدہ کی قراردادوں کے مطابق مسئلہ کشمیر کے منصفانہ حل کی یاد دہانی کرانا ہے۔

انہوں نے کہا کہ مرکزی تقریب مظفرآباد میں کل جماعتی حریت کانفرنس کے کنوینئر غلام محمد صفی کی قیادت میں ہوگی، جس میں حکومت آزاد کشمیر کے نمائندگان ، حریت قائدین ،سیاسی قائدین، دانشور، طلبہ، سول سوسائٹی کے نمائندے اور مختلف طبقات سے تعلق رکھنے والے افراد شریک ہوں گے۔ شرکا سیاہ پرچموں اور بینرز کے ساتھ بھارتی قبضے کی مذمت کریں گے اور آزادی کے عزم کا اظہار کریں گے۔

یومِ سیاہ کے موقع پر تصویری نمائشیں، دستاویزی فلموں کی سکریننگ،مشعل بردار ریلیاں اور خصوصی دعائیہ اجتماعات کا بھی اہتمام کیا جائے گا تاکہ شہدائے کشمیر کو خراجِ عقیدت پیش کیا جا سکے اور کشمیری عوام کی طویل جدوجہد و قربانیوں کو سلام پیش کیا جائے۔انہوں نے کہا کہ اے جے کے حکومت نے ان سرگرمیوں کے انعقاد کے لیے مکمل تعاون فراہم کیا ہے جبکہ سوشل اور الیکٹرانک میڈیا پر آگاہی مہمات بھی جاری ہیں تاکہ نئی نسل کو 27 اکتوبر کی تاریخی اہمیت اور تحریکِ آزادی کشمیر کے بنیادی پیغام سے روشناس کرایا جا سکے۔

مشتاق احمد بٹ نے آزاد کشمیر، پاکستان اور دنیا بھر میں بسنے والے کشمیریوں سے اپیل کی کہ وہ یومِ سیاہ کے پروگراموں میں بھرپور شرکت کریں اور بھارتی مظالم کے خلاف اپنے مظلوم بھائیوں سے یکجہتی کا اظہار کریں۔

انہوں نے کہا کہ کشمیری عوام کا حقِ خودارادیت اقوامِ متحدہ کی قراردادوں سے تسلیم شدہ ہے، اور یہ جدوجہد اس وقت تک جاری رہے گی جب تک کشمیری قوم کو بھارتی قبضے سے مکمل آزادی حاصل نہیں ہو جاتی۔انہوں نےیہ عزم دہرایا کہ کشمیری عوام کی قربانیاں رائیگاں نہیں جائیں گی اور جدوجہد آزادی کو اس کے منطقی انجام تک پہنچایا جائے گا۔