سری لنکا اے ٹیم پاکستان شاہینز کے خلاف چار روزہ میچ کی اپنی پہلی اننگز میں 310 رنز بنا کر آؤٹ

راولپنڈی۔19نومبر (اے پی پی):سری لنکا اے ٹیم پاکستان شاہینز کے خلاف چار روزہ میچ کے دوسرے روز اپنی پہلی اننگز میں 310 رنز بنا کر آؤٹ ہو گئی ، سونال دنوشا نے 85 رنز کی اننگز کھیلی، پاکستان شاہینز کی طرف سے خرم شہزاد نے 6 وکٹیں حاصل کیں ، پاکستان شاہینز نے کھیل کے اختتام پر اپنی پہلی اننگز میں 5 وکٹوں کے نقصان پر 212 رنز بنا لیے ، عبدالفصیح نے نصف سنچری سکور کی ، حسین طلعت 18 اور محمد غازی غوری 5 رنز کے ساتھ وکٹ پر موجود ہیں ، ونوجا ساہن نے 2 کھلاڑیوں کو آؤٹ کیا ، پاکستان شاہینز کو سری لنکا اے کی پہلی اننگز کا اسکور برابر کرنے کے لیے مزید 98 رنز درکار ہیں ۔

راولپنڈی کرکٹ اسٹیڈیم میں جاری چار روزہ میچ کے دوسرے روز سری لنکا اے نے اپنی پہلی نامکمل اننگز 293 رنز 8 کھلاڑی آئوٹ پر دوبارہ شروع کی تو سونال دنوشا 81 اور اسیتھا وجے سندرا 38 رنز کے ساتھ وکٹ پر موجود تھے ، مہمان ٹیم کے بقیہ دو کھلاڑی گزشتہ روز کے اسکور میں 17 رنز کا اضافہ کر سکے ، اسیتھا وجے سندرا 51 رنز بنا کر کاشف علی کی گیند پر کلین بولڈ ہو گئے جبکہ چمیکا گونا سیکرا کو صفر پر احمد بشیر نے آؤٹ کیا ، اس طرح سری لنکا اے اپنی پہلی اننگز میں 310 رنز بنا کر آؤٹ ہو گئی ، خرم شہزاد نے 6 کھلاڑیوں کو آؤٹ کیا ، احمد صفی عبداللہ نے دو جبکہ احمد بشیر اور کاشف علی نے ایک، ایک وکٹ حاصل کی ، جواب میں پاکستان شاہینز نے دوسرے روز کھیل کے اختتام پر 5 وکٹوں کے نقصان پر 212 رنز بنا لیے ،

شاہینز کی پہلی وکٹ 16 کے مجموعی اسکور پر گر گئی جب کپتان محمد ہریرہ صرف 4 رنز بنا کر وجے سندرا کی گیند پر ایل بی ڈبلیو ہو گئے، اس کے بعد عبدالفصیح اور علی زریاب اسکور کو 98 تک لے گئے ، علی زریاب دوسرے آؤٹ ہونے والے کھلاڑی تھے جو 32 رنز بنا کر نپون دھننجایا کی گیند اسٹمپ آؤٹ ہو گئے ، عبدالفصیح نے 59 رنز کی عمدہ اننگز کھیلی ، انہیں چمیکا گونا سیکرا نے آئوٹ کیا ، محمد سلیمان کی 40 رنز کی اننگز کا خاتمہ ونوجا ساہن نے ایل بی ڈبلیو کے ذریعے کیا، ونوجا ساہن نے اپنی دوسری کامیابی حیدر علی کو آؤٹ کر کے حاصل کی جو 35 رنز بنا سکے، کھیل کے اختتام پر حسین طلعت 18 اور غازی غوری 5 رنز بنا کر کریز پر موجود تھے۔