سعودی عرب ،ریاض میں سیلف ڈرائیونگ ڈیلیوری سروس کا پائلٹ پراجیکٹ شروع

ریاض۔7اکتوبر (اے پی پی):سعودی عرب کی جنرل ٹرانسپورٹ اتھارٹی نے ریاض میں سیلف ڈرائیونگ ڈیلیوری سروس کے پائلٹ پراجیکٹ کا آغاز کر دیا ہے جو اس کی جدید ٹیکنالوجیز کو اپنانے، ٹرانسپورٹ اور لاجسٹکس کے شعبے میں انوویٹیو سلوشنز فعال کرنے کی کوششوں کا حصہ ہے۔

ایس پی اے کے مطابق اس اقدام سے ڈیلیوری سروسز کی کارکردگی و معیار بہتر بنانے اور صارفین کے تجربے کو موثر بنانے میں مدد ملے گی۔اتھارٹی کا کہنا ہے کہ یہ منصوبہ گزشتہ برس منعقد ہونے والے سالانہ ’ٹرانسپورٹ ہیکاتھون‘ میں پیش کیے گئے تصور کو عملی شکل دینے کی کامیاب مثال ہے۔سیلف ڈرائیونگ ڈیلیوری گاڑیاں ریاض کے ایک مخصوص جغرافیائی زون میں آرڈرز کی ترسیل کے لیے استعمال کی جا رہی ہیں،اس کا آغاز الفلاح ڈسٹرکٹ سے کیا گیا ۔صارف کی جانب سے آن لائن آرڈر موصول ہونے کے بعد اسے گاڑی میں رکھا جاتا ہے جو خود کار جی پی ایس نظام کے تحت ایڈریس تک پہنچ جاتی ہے۔ان گاڑیوں میں لیول فور کی خود کارڈرائیونگ ٹیکنالوجی استعمال کی گئی ہے۔

360 ڈگری سینسرز کے ذریعے اردگرد کے ماحول کی مسلسل نگرانی کی جاتی ہے جبکہ گاڑیوں کی براہ راست نگرانی ایک ریموٹ آپریشن سینٹر سے کی جاتی ہے، ہنگامی صورتحال میں گاڑی کو فوری طورپر روکا بھی جا سکتا ہے۔اتھارٹی کے مطابق اس منصوبے کا اہم ہدف ڈیلیوری کی لاگت میں 85 فیصد تک کمی لانا ہے، اس مقصد کے لیے الیکٹرک گاڑیوں پر مشتمل ایسا فلیٹ استعمال کیا جا رہا ہے جو دوران آپریشن کاربن کا اخراج نہیں کرتا اور سڑکوں پر شور کم کرنے میں بھی معاون ہوتا ہے۔منصوبے سے گاڑیوں کی مقامی تیاری کو فروغ دینے کے ساتھ سعودی شہریوں کے لیے انجینئرنگ، ٹیکنالوجی اور ریموٹ آپریشن کے شعبوں میں ملازمتوں کے مواقع پیدا ہونے کی توقع ہے۔ اس سے خود کار ڈیلیوری ٹیکنالوجی کے معاشی اور ماحولیاتی فوائد کو مزید وسعت دی جا سکے گی۔