سپیکر قومی اسمبلی سردار ایاز صادق سے بنگلہ دیش کے نو ہم منصب کا ٹیلیفونک رابطہ، پارلیمانی تعلقات کو مزید مضبوط بنانے پر تبادلہ خیال

اسلام آباد۔13مارچ (اے پی پی):سپیکر قومی اسمبلی سردار ایاز صادق سے بنگلہ دیش کی پارلیمنٹ کے نو منتخب سپیکر حفیظ الدین احمد نے جمعہ کو ٹیلیفونک رابطہ کیا جس میں دونوں ممالک کے درمیان پارلیمانی تعلقات کو مزید مضبوط بنانے پر تبادلہ خیال کیا ۔قومی اسمبلی سیکرٹریٹ کے مطابق بنگلہ دیش کے نو منتخب سپیکر میجر (ر) حفیظ الدین احمد نے سپیکر قومی اسمبلی سردار ایاز صادق کی جانب سے بھیجے گئے تہنیتی پیغام پر ان کا شکریہ ادا کیا۔گفتگو کے دوران دونوں رہنمائوں نے پاکستان اور بنگلہ دیش کے درمیان پارلیمانی تعاون اور رابطوں کو فروغ دینے کی اہمیت پر زور دیا۔

اس موقع پر سردار ایاز صادق نے بنگلہ دیش کی پارلیمنٹ کے ساتھ تعاون اور روابط کو مزید وسعت دینے کے عزم کا اظہار کیا۔ٹیلیفونک گفتگو میں باہمی دلچسپی کے امور اور پارلیمانی سفارت کاری کے فروغ سے متعلق معاملات پر بھی تبادلہ خیال کیا گیا۔سپیکر قومی اسمبلی نے بنگلہ دیش کے نو منتخب سپیکر کو پاکستان کا دورہ کرنے کی دعوت دیتے ہوئے کہا کہ پاکستان کی پارلیمان اور عوام ان کے دورے کے منتظر ہیں۔انہوں نے بنگلہ دیش کے نو منتخب سپیکر کے لیے نیک خواہشات کا اظہار کرتے ہوئے ان کی کامیابی کے لیے دعا بھی کی۔