اسلام آباد۔16اگست (اے پی پی):سپیکر قومی اسمبلی سردار ایاز صادق سے گورنر پنجاب سردار سلیم حیدر نے سپیکر ہائوس میں ملاقات کی۔ جمعہ کو قومی اسمبلی سیکرٹریٹ سے جاری بیان کے مطابق ملاقات میں پارلیمانی امور سمیت باہمی دلچسپی کے دیگر امور پر تبادلہ خیال کیاگیا۔ ملاقات میں سپیکر قومی اسمبلی نے گورنر پنجاب سردار سلیم حیدر کے لیے نیک خواہشات کا اظہار کیا۔
ملاقات میں سپیکر قومی اسمبلی نے کہا کہ موجودہ پارلیمان مؤثر قانون سازی کے ذریعے عوام کی فلاح و بہبود اور ملک کو درپیش مسائل کو حل کرنے کے لیے پر عزم ہے ۔ صوبوں اور وفاق کے مابین ہم آہنگی اور رابطوں کا فروغ عوام کی ترقی اور خوشحالی کیلئے ضروری ہے۔ وفاق اور صوبوں میں قریبی رابطے ملک کو درپیش مسائل کو حل کرنے میں کلیدی اہمیت کے حامل ہیں ۔
گورنر پنجاب نے ایوان کی کارروائی کو غیر جانبداری اور خوش اسلوبی سے چلانے پر سپیکر قومی اسمبلی کے کردار کو سراہا۔ انہوں نے کہا کہ موثر قانون سازی ملک کو ترقی کی راہ پر گامزن کرنے کے لیے ضروری ہے۔ پارلیمان کی جانب سے عوامی فلاح و بہبود کیلئے کی گئی قانون سازی قابل تعریف ہے۔ملاقات میں گورنر پنجاب سردار سلیم حیدر نے اپنے لئے نیک خواہشات کے اظہار پر سپیکر کا شکریہ ادا کیا ۔
Short Link: https://urdu.app.com.pk/urdu/?p=494587
