ضلع سرگودھا میں بے نظیر انکم سپورٹ پروگرام فلیگ شپ کے تحت رجسٹرڈ مستحق اور ضرورتمند خاندانوں کا سروے جاری ہے،ڈپٹی ڈائریکٹر

سرگودھا ۔ 19 اکتوبر (اے پی پی):ضلع سرگودھا میں بے نظیر انکم سپورٹ پروگرام کے فلیگ شپ کے تحت رجسٹرڈ مستحق اور ضرورت مند خاندانوں کا سروے جاری ہے۔ ان خیالات کا اظہار ڈپٹی ڈائریکٹر بے نظیر انکم سپورٹ پروگرام سرگودھا شہزاد وٹو نے ایسوسی ایٹڈ پریس آف پاکستان سے گفتگو کرتے ہوئے کیا۔ انہوں نے بتایا کہ بے نظیر انکم سپورٹ پروگرام کے فلیگ شپ کے تحت سروے کی دوبارہ سرٹیفیکیشن جاری ہے جو کہ گھروں کی سماجی معاشی حیثیت کا تعین کرتا ہے۔

اُنہوں نے بتایا کہ سرگودھا میں 197570 مستحق افراد پہلے ہی بینظیر انکم سپورٹ پروگرام سے مالی امداد اور فوائد حاصل کر رہے ہیں۔ انہوں نے کہا کہ بے نظیر انکم سپورٹ پروگرام میں شفاف سروے کو یقینی بنانے کے لیے خواہشمند اپنا قومی شناختی کارڈ اور بچوں کا فارم (ب) ساتھ لے کر آئیں اور اس کی ایک ایک کاپی درخواست کے ساتھ لف کریں۔

ڈپٹی ڈائریکٹر نے کہا کہ قوانین اور ہدایات کے مطابق روزانہ کی بنیاد پر 70 سروے کیے جائیں گے جبکہ دیگر کو شفافیت کو یقینی بنانے اور کم مراعات یافتہ طبقے کی عزت اور احترام کے ساتھ خدمت کرنے کے لیے مستقبل کا ٹوکن دیا جائے گا۔