ماہرین صحت کا سردیوں میں جسم کو توانا اور صحت مند رکھنے کےلئے قہوہ اور گولڈن ملک جیسے گرم مشروبات کا زیادہ استعمال کرنے کا مشورہ

اسلام آباد۔7دسمبر (اے پی پی):ماہرین صحت نے عوام پر زور دیا ہے کہ وہ موسم سرما میں خشک میوہ جات، میٹھی اور تلی ہوئی اشیاء کھانے میں اعتدال سے کام لیں، خوراک میں قہوہ اور گولڈن ملک جیسے گرم مشروبات کا زیادہ استعمال یقینی بنائیں تاکہ سرد مہینوں میں جسم کو توانا اور صحت مند رکھا جا سکے۔نیوٹریشنسٹ حنا انیس نے بتایا کہ سردیوں میں اکثر لوگ خشک میوہ جات، میٹھی اشیاء اور تلی ہوئی غذاؤں کا زیادہ استعمال کر لیتے ہیں، اگرچہ یہ چیزیں آرام دہ محسوس ہوتی ہیں، لیکن ان کا زیادہ استعمال ہاضمہ کے مسائل، وزن میں اضافہ اور دیگر صحت کے مسائل پیدا کر سکتا ہے۔

انہوں نے سرد مہینوں میں اعتدال اور خوراک کے انتخاب میں احتیاط کی اہمیت پر زور دیا۔حنا انیس نے مشورہ دیا کہ لوگ بار بار کافی اور عام چائے کی جگہ گرم اور غذائیت سے بھرپور مشروبات جیسے قہوہ اور گولڈن ملک استعمال کریں۔ یہ مشروبات نہ صرف سردی میں آرام دیتے ہیں بلکہ قوت مدافعت کو بہتر بناتے ہیں، ہاضمہ کو بہتر کرتے ہیں اور دن بھر توانائی برقرار رکھنے میں مدد دیتے ہیں۔

انہوں نے سردیوں میں متوازن خوراک کے بارے میں عوامی شعور اجاگر کرنے کی ضرورت پر بھی زور دیا،موسمی لذتوں سے ذمہ داری کے ساتھ ضرور لطف اٹھائیں،صحت مند غذاؤں اور غذائیت سے بھرپور مشروبات کو شامل کر کے مجموعی تندرستی کو یقینی بنایا جا سکتا ہے جبکہ سردیوں کے مزے بھی لیے جا سکتے ہیں۔نیوٹریشنسٹ حنا انیس نے سردیوں کی خوراک میں جڑی بوٹیوں والی چائے (ہربل ٹی) اور پروٹین سے بھرپور غذائیں جیسے مچھلی اور کم فیٹ والا گوشت شامل کرنے کے فوائد بھی اجاگر کئے۔

انہوں نے بتایا کہ ہربل ٹی جسم کو گرم رکھنے اور ہاضمہ بہتر کرنے میں مدد دیتی ہےجبکہ مچھلی اور کم چربی والا گوشت ضروری غذائی اجزاء اور پروٹین فراہم کرتے ہیں جو قوت مدافعت کو مضبوط بناتے ہیں اور سرد مہینوں میں توانائی برقرار رکھتے ہیں۔حنا انیس نے زور دیا کہ میٹھے اور خشک میوہ جات میں اعتدال کے ساتھ ان غذاؤں کا توازن رکھنے سے سردیوں میں لوگ صحت مند اور توانا رہ سکتے ہیں۔

ایک سوال کے جواب میں نیوٹریشنسٹس نے بتایا کہ گولڈن ملک، ہلدی، لونگ اور گڑ سے بننے والا روایتی سردیوں کا مشروب نہ صرف لذیذ ہوتا ہے بلکہ صحت کے لیے بھی بہت فائدہ مند ہے۔ان کے مطابق یہ گرم مشروب اینٹی آکسیڈنٹس اور اینٹی انفلامیٹری اجزاء سے بھرپور ہوتا ہے جو قوت مدافعت بڑھاتا ہے، تھکاوٹ سے لڑتا ہے اور سرد موسم میں جسم کو توانا رکھتا ہے۔ماہرین نے کافی یا میٹھے مشروبات کا صحت مند متبادل قرار دیتے ہوئے سردیوں کی خوراک میں ضرور شامل کرنے کی تجویز دی۔