مغربی کنارے میں اسرائیلی آباد کار دہشت گرد ی کی کارروائیاں کر رہے ہیں ،فرانس

پیرس۔30جولائی (اے پی پی):فرانس نے مقبوضہ مغربی کنارے میں فلسطینیوں پر اسرائیلی آباد کاروں کے بڑھتے ہوئے حملوں کی مذمت کرتے ہوئےانہیں دہشت گردی قرار دیا ہے ۔العربیہ کے مطابق فرانس کی جانب سے یہ مذمتی بیان اس وقت سامنے آیا ہے جب مغربی کنارے میں یہودی آباد کاروں نے ایک ایسے فلسطینی کو تشدد کر کے شہید کیا جس نے مغربی کنارے پر اسی تشدد کے بارے میں ایک دستاویزی فلم تیار کرنے میں حصہ لیا تھا اور اس دستاویزی فلم کو بین الاقوامی سطح پر بعد ازاں آسکر ایوارڈ ملا ۔فلسطینی حکام نے بتایا کہ عودہ محمد ھذالین کو یہودی آباد کاروں نےشہید کیا وہ ایک ٹیچر تھے۔

فرانس کی وزارت خارجہ نے اس بارے میں کہا ہے کہ مسلسل پر تشدد واقعات جن میں یہودی آباد کار بار بار فلسطینیوں کو نشانہ بنا رہے ہیں یہ کھلی دہشت گردی ہے۔فرانس کی وزارت خارجہ نے اسرائیل سے مطالبہ کیا ہے کہ وہ ان بڑھتے ہوئے پر تشدد واقعات کے ذمہ داروں کو سزا دے کہ وہ مسلسل اور مکمل استثنیٰ کے ساتھ فلسطینیوں کو ہدف بنا رہے ہیں، نیز اسرائیلی حکومت فلسطینیوں کو مکمل تحفظ فراہم کرے۔