اسلام آباد۔28اپریل (اے پی پی):ملک بھر میں پولیو وائرس کی موثر نگرانی جاری ہے۔ نیشنل ایمرجنسی آپریشنز سینٹر کی جانب سے جاری اعداد شمار کے مطابق 44 اضلاع سے 56 ماحولیاتی نمونے جمع کیے گئے، 34 ماحولیاتی نمونوں کے منفی ہونے کی تصدیق جبکہ 22 ماحولیاتی نمونوں میں پولیو وائرس کی موجودگی کی تصدیق ہوئی ہے۔فروری اور اپریل کی مہمات کے نتیجے میں وائرس کے پھیلائو میں نمایاں کمی دیکھی جا رہی ہے۔رواں سال کی دوسری قومی پولیو مہم 21 سے 27 اپریل تک کامیابی کے ساتھ منعقد کی گئی
مہم کے دوران 4 کروڑ 53 لاکھ سے زائد بچوں کو پولیو کے قطرے پلائے گئے۔ پنجاب اور سندھ 100 فیصد، خیبرپختونخوا 101 فیصد جبکہ بلوچستان میں 102 فیصد بچوں کی ویکسینیشن مکمل ہوئی۔ اسلام آباد 106 فیصد، آزاد کشمیر 100 فیصد جبکہ گلگت بلتستان میں 101 فیصد بچوں کی ویکسینیشن مکمل کی گئی۔ آئندہ ماہ سال 2025 ءکی تیسری پولیو مہم کا انعقاد کیا جائے گا۔ والدین سے اپیل ہے کہ وہ پولیو ورکرز کے ساتھ اپنا بھرپور تعاون جاری رکھیں
ہر مہم کے دوران پانچ سال سے کم عمر بچوں کو پولیو کے قطرے لازمی پلوائیں۔ یاد رکھیں کہ ویکسین کی اضافی خوراکیں بچوں کی قوت مدافعت کو مزید مضبوط بناتی ہیں۔
Short Link: https://urdu.app.com.pk/urdu/?p=589202
