اسلام آباد۔25اپریل (اے پی پی):وفاقی وزیر مواصلات عبدالعلیم خان نے ہدایت کی ہے کہ ملک بھر کی موٹرویز پر اوور سپیڈنگ اور ایکسل لوڈ پالیسی پر کوئی سمجھوتہ نہیں ہوگا، خلاف ورزی کرنے والوں کے لئے زیرو ٹالرنس پالیسی اپنائی جائے، کمرشل گاڑیوں کے لئے 3 ماہ میں فٹنس سرٹیفکیٹ اور ڈرائیورز کی خصوصی تربیت کا بندوبست کیا جائے۔ اس امر کا اظہار انہوں نے نیشنل ہائی ویز اینڈ موٹروے پولیس ہیڈ کو آرٹرز کے دورے کے موقع پر اعلیٰ سطحی اجلاس کی صدارت کرتے ہوئے کیا۔
وفاقی وزیر مواصلات نے ہدایت کی کہ موٹرویز پر حادثات میں کمی لانے کے لئے 20سال سے زائد پرانی گاڑیوں کو آنے کی اجازت نہیں ملے گی، گاڑیوں کے ٹائرز کے لئے علیحدہ سے سرٹیفکیٹ جاری ہوں گے۔انہوں نے آئی جی موٹرویز پولیس کو اس ضمن میں مربوط پالیسی تشکیل دینے اور اس پر سختی سے عملدرآمد یقینی بنانے کی ہدایت کی۔ عبدالعلیم خان کا کہنا تھا کہ موٹروے پر ایک ہی جگہ پر حادثات قابل تشویش ہیں، اوور سپیڈنگ پر ایف آئی آر کے اندراج کے مثبت اثرات سامنے آئے ہیں، انسانی جانوں کی حفاظت ہماری اولین ترجیح ہے اور موٹروے پولیس کو اپنے پہلے سے موجود معیار میں مزید بہتری لانا ہوگی۔
اجلاس میں وفاقی وزیر مواصلات کو بریفنگ دیتے ہوئے آئی جی موٹرویز نے بتایا کہ حفاظتی باڑ چوری ہونے کی اب تک 53 ایف آئی آر درج ہو چکی ہیں جبکہ 36ملازمین کو گرفتار کر کے ان سے دو ہزار میٹر باڑ برآمد کر لی گئی ہے۔ وفاقی وزیر مواصلات عبدالعلیم خان نیشنل ہائی ویز اینڈ موٹروے پولیس ہیڈ کو آرٹر پہنچے تو انہیں چاق و چوبند دستے نے سلامی پیش کی۔ وفاقی سیکرٹری مواصلات، آئی جی موٹر ویز اور سینئر افسران نے ان کا استقبال کیا جبکہ وفاقی وزیر عبدالعلیم خان نے موٹروے پولیس کے شہداء کے لئے قائم یادگار پر پھول چڑھائے اور اپنے فرائض کی بجا آوری میں جام شہادت نوش کرنے والوں کے درجات کی بلندی کی دعا کی۔
وفاقی وزیر مواصلات نے موٹر وے پولیس کے کنٹرول روم کا معائنہ کیا اور ہیلپ لائن پر شکایات کے اندراج اور کم سے کم وقت میں اُس کے ازالے کے طریقہ کار پر بریفنگ لی۔ وفاقی وزیر عبدالعلیم خان نے ہدایت کی کہ موٹر وے پولیس کو موجودہ دور کے تقاضوں کے مطابق سوشل میڈیا پر بھی اپنی خدمات کو اجاگر کرنا چاہئے۔ وفاقی وزیر عبدالعلیم خان نے موٹر وے پر چند روز قبل شہید ہونے والے انسپکٹر منصور اصغر اور دیگر شہداء کے ایصال ثواب کے لئے فاتحہ خوانی کی اور موٹر وے حکام سے کہا کہ وہ سب سے پہلے اپنی جانوں کے تحفظ کو مقدم رکھیں اور موٹر ویز پر مختلف مقامات پر ایسے” شولڈرز” بنائے جائیں جہاں ہنگامی صورتحال میں گاڑیوں کو روکا جا سکے۔
Short Link: https://urdu.app.com.pk/urdu/?p=587887
