نائب وزیرِاعظم و وزیرِ خارجہ اسحاق ڈار سے جاپان کے وزیرِ خارجہ کی ٹیلیفون پر گفتگو، مشرقِ وسطیٰ اور وسیع تر خطے کی صورتحال پر تبادلہ خیال

اسلام آباد۔6اپریل (اے پی پی):نائب وزیرِاعظم و وزیرِ خارجہ سینیٹر محمد اسحاق ڈار سے پیر کو جاپان کے وزیرِ خارجہ توشی متسو موتیگی نے ٹیلیفون پر گفتگو کی ۔پیر کو وزارت خارجہ سے جاری بیان کے مطابق دونوں رہنماؤں نے مشرقِ وسطیٰ اور وسیع تر خطے کی موجودہ صورتحال پر تبادلہ خیال کیا اور کشیدگی میں فوری کمی کی اہمیت پر زور دیا۔

نائب وزیرِاعظم و وزیرِ خارجہ محمد اسحاق ڈار نے کشیدگی کے خاتمے اور دیرپا امن و استحکام کے حصول کے لئے تمام اقدامات کی حمایت کے عزم کا اعادہ کیا۔وزیرِ خارجہ توشی متسو موتیگی نے خطے میں امن و استحکام کے لئے مکالمے اور سفارتکاری کو فروغ دینے میں پاکستان کے مثبت کردار کو سراہا اور اس کی حمایت کی۔دونوں رہنماؤں نے باہمی رابطے برقرار رکھنے پر اتفاق کیا۔