نیوزی لینڈ کے فاسٹ بائولر ٹم ساؤتھی کا ٹیسٹ کرکٹ سے ریٹائرمنٹ کا اعلان

ویلنگٹن۔15نومبر (اے پی پی):نیوزی لینڈ کے فاسٹ بائولر ٹم ساؤتھی نے ٹیسٹ کرکٹ سے ریٹائرمنٹ کا اعلان کر دیا۔اپنی ریٹائرمنٹ کے اعلان پر ٹم ساؤتھی کا کہنا تھا کہ نیوزی لینڈ کیلئے 18 برس کھیلنا ایک اعزاز ہے، نیوزی لینڈ کی نمائندگی کرنا شروع سے خواب تھا۔35 سالہ کیوی فاسٹ بائولر کی ریٹائرمنٹ کے اعلان پر نیوزی لینڈ کے ہیڈ کوچ گیری سٹیڈ کا کہنا تھا کہ ٹم ساؤتھی کا کیرئیر شاندار رہا ریکارڈز ان کے بارے میں سب کچھ بتا رہے ہیں، انہوں نے نیوزی لینڈ کی فتوحات میں اہم کردار ادا کیا ہے۔

ٹم ساؤتھی آئندہ ماہ انگلینڈ کے خلاف ہوم گراؤنڈ پر ہملٹن میں آخری ٹیسٹ میچ کھیلیں گے تاہم نیوزی لینڈ نے اگر ورلڈ ٹیسٹ چیمپئن شپ کے فائنل کیلئے کوالیفائی کیا تو بھی وہ ٹیم کو دستیاب ہوں گے۔ٹم ساؤتھی انگلینڈ کے خلاف ٹیسٹ سیریز کے بعد اپنے وائٹ بال کیرئیر کے حوالے سے بھی فیصلہ کریں گے۔ٹم ساؤتھی کو 104 ٹیسٹ ، 161 ون ڈے اور 126 ٹی ٹونٹی میچز میں نیوزی لینڈ کی نمائندگی کا اعزاز حاصل ہے، اس دوران انہوں نے 104 ٹیسٹ میچز میں 385 وکٹیں جبکہ 161 ون ڈے میچز میں 221 اور 126 ٹی ٹونٹی میچز میں 164 وکٹیں حاصل کیں ہیں۔

واضح رہے کہ نیوزی لینڈ اور انگلینڈ کی ٹیموں کے درمیان تیسرا ٹیسٹ 14 دسمبر سے ہملٹن میں شروع ہو گا۔ٹم سائوتھی بین الاقوامی کرکٹ میں نیوزی لینڈ کے لئ سب سے زیادہ وکٹیں لینے والے بائولر ہیں۔35 سالہ ٹم ساؤتھی نے اب تک 104 ٹیسٹ میچوں میں 385 ٹیسٹ وکٹیں حاصل کی ہیں جو کہ نیوزی لینڈ کے کھلاڑیوں میں سر رچرڈ ہیڈلی کے بعد دوسرے نمبر پر ہیں، نیوزی لینڈ کے سر رچرڈہیڈلی نے 431 وکٹیں حاصل کی تھیں۔ ٹم سائوتھی نے 22مارچ 2008 میں نیپئر میں انگلینڈ کے خلاف 19 سال کی عمر میں اپنا ٹیسٹ ڈیبیو کیا تھا۔ ساؤتھی نے اپنی ریٹائرمنٹ کے اعلان میں کہا کہ نیوزی لینڈ کی نمائندگی کرنا ہی میرا بڑا خواب تھا ۔میرے لئے بلیک کیپس کے لیے 18 سال تک کھیلنا سب سے بڑا اعزاز ہے