والی بال نیشنز لیگ، امریکہ نے یکطرفہ مقابلے میں چین کو ہرا دیا

واشنگٹن۔16جولائی (اے پی پی):والی بال نیشنز لیگ کے تیسرے ہفتے کے افتتاحی میچ میں چین کو امریکہ کے ہاتھوں سٹریٹ سیٹس میں شکست کا سامنا کرنا پڑا ہے۔

شنہوا کے مطابق شکاگو میں کھیلے گئے اس یکطرفہ میچ میں عالمی نمبر پانچ امریکہ نے کھلاڑیوں کے زخمی ہونے کے مسائل سے دوچار 32 ویں نمبر پر موجود چینی ٹیم کو 19-25، 13-25 اور 20-25 سے شکست دے کر ٹورنامنٹ میں اپنی ساتویں کامیابی حاصل کی، جس کے بعد وہ پوائنٹس ٹیبل پر دوسرے نمبر پر موجود ہے۔ دوسری جانب نوجوان کھلاڑیوں کے ساتھ میدان میں اترنے والی چینی ٹیم 9 میچوں میں سے صرف ایک میچ جیت سکی ہے اور وہ چار پوائنٹس کے ساتھ ٹیبل پر سب سے آخری نمبر پر ہے۔امریکی کھلاڑیوں نے میچ کے دوران بیٹنگ، بلاکنگ اور سرونگ ہر شعبے میں اپنی برتری برقرار رکھی، جہاں کوپر رابنسن اور ایتھن چیمپلن نے سب سے زیادہ 14، 14 پوائنٹس سکور کیے جبکہ چین کی جانب سے آؤٹ سائیڈ ہٹر لی لئی 8 پوائنٹس کے ساتھ نمایاں رہے۔ چین نے تیسرے سیٹ میں بھرپور مزاحمت دکھائی اور ایک موقع پر سکور کا خسارہ کم کر کے 14-13 تک لے آئے لیکن امریکی ٹیم نے جارحانہ سروسز کے ذریعے دوبارہ میچ پر کنٹرول حاصل کر کے کلین سویپ مکمل کر لیا۔ شکاگو میں کھیلے گئے دیگر میچوں میں برازیل نے اولمپک چیمپئن فرانس کو جبکہ دفاعی چیمپئن پولینڈ نے بلغاریہ کو شکست دی۔ یاد رہے کہ والی بال نیشنز لیگ کے فائنلز 29 جولائی سے چین کے شہر ننگبو میں کھیلے جائیں گے جہاں میزبان ہونے کی حیثیت سے چینی ٹیم پہلے ہی فائنلز کے لیے کوالیفائی کر چکی ہے۔